Për momentin, dihet tema kryesore për ndryshimet kushtetuese – anëtarësimi në NATO dhe Bashkim Evropian. Mendojmë se nuk është momenti që këtë agjendë ta
ngarkojmë edhe me çështje të tjera, pasi synimi i të gjithë neve është realizimi final i qëllimit – anëtarësimi në NATO, shprehet ministri i Arsimit dhe Shkencës, Arbër Ademi në emisionin Rruga Drejt në Alsat-M. Ai gjithashtu ka shtuar se, i madh e i vogël e dinë tashmë se strategjia e BDI-së dhe liderit Ali Ahmeti është anëtarësimi në NATO dhe BE dhe në momentet kyçe, askush nga BDI nuk dëshiron që për pikë politike, të hapë çështje të tjera.

“Bashkimi Demokratik për Integrim është parti serioze, e përgjegjshme me përcaktime të qarta programore dhe politike dhe i mbështesim këto ndryshime kushtetuese, pa e ngarkuar situatën edhe
më shumë me kërkesa të tjera. Anëtarësimi në NATO dhe në BE është qëllimi i qytetarëve të vendit dhe ky është edhe synimi ynë”, tha Ademi, sipas të cilit, për momentin, shumë më me rëndësi është miratimi i ndryshimeve kushtetuese që sjell NATO-ja sesa agjenda të tjera politike të brendshme.

Sipas Ademit, realiteti,relacionet, gjeopolitika dhe interesat strategjike janë në radhë të parë në këto momente.

“Agjendën nuk duhet ta ngarkojmë me tendencë për të komplikuar situatën ashtu edhe të komplikuar. Ne duhet t’i inkurajojmë deputetët të votojnë ndryshimet kushtetuese, sepse kjo hap rrugën drejt të ardhmes të ndritur”, tha Ademi, duke përsëritur në sigurimin e dy të tretave të votave për ndryshimet kushtetuese.