Robotët rrezikojnë të pensionojnë para kohe njerëzimin, ja çfarë pritet deri në 2025

Zhvillimi i teknologjisë po kthehet në një rrezik serioz për njerëzimin. Sipas studimit më të fundit, thuhet se robotët do të kryjnë më shumë se “gjysmën e detyrave aktuale në vendet e punës” deri në vitin 2025.

Në një raport të Forumit Ekonomik Botëror të prezantuar më 17 shtator, vlerësohet se 52 përqind e të gjitha detyrave, pothuajse dyfishifi i normës aktuale do të përfundohen nga makinat, duke zhvendosur pothuajse 75 milion njerëz nga vendi i punës.

“Deri më 2025 më shumë se gjysma e detyrave të punës do të kryhen nga pajisjet, në krahasim me normën aktuale prej 29 përqind”, ka thënë Organizata joqeveritare me bazë në Zvicër.

Në raportin e titulluar “E Ardhmja e vendeve të Punës 2018”, Organizata ka thënë se konsideron që robotët do të zëvendësojnë njerëzit në sektorin e menaxhimit të klientëve, kontabilitetit, postës dhe ata industrialë.

Në po të njëjtën kohë, raporti thekson se do të ketë rritje të kërkesës për vendet e punës që kërkojnë “aftësi njerëzore”, siç janë shitjet, marketingu, shërbimet ndaj konsumatorit, së bashku me ato që lidhen me shitjet online dhe rrjetet sociale.

Sipas raportit, sfida kyçe do të jetë në fazën e trajnimit të punëtorëve, sidomos në fushën e “kreativitetit, mendimit kritik dhe vendosshmërisë”.

Raporti këshillon Qeveritë që të përgatisin punëtorët e rrezikuar nga ato që janë konsideruar si “ndryshime të mëdha” në kualitetin dhe vazhdimësinë e vendeve të punës./Ora News.tv/

SHPËRNDAJE