Futbollisti shqiptar i Arsenalit, Granit Xhaka, ka dhënë një intervistë të gjatë për gazetën angleze The Guardian, ku ka rrëfyer shumë gjëra në lidhje me të kaluarën e familjes së tij në Kosovë.

Babai i Granitit kishte kaluar tre vite e gjysmë në burg, si i burgosur politik nga sistemi jugosllav në Kosovë.

“Me aq sa di unë, muajt e parë të burgut shkonin mirë, por më vonë filluan ta rrahin si i burgosur politik”, fillon tregimin e tij Graniti.

Ragip Xhaka, babai i tij, ishte pjesëmarrës në demonstrata kundër qeverisë së Beogradit.

Në vitin 1986 ai ishte 22 vjeç, dhe student i Universitetit të Prishtinës.

“Si djali i tij, kjo është diçka që më prek shumë, dhe e kam në zemrën time”.

“Babai im është një kosovar krenar, dhe mendonte që atë kohë se ata kishin të drejtë të ekzistonin. Ai protestonte për të drejtat e tij”.

Prindërit e Xhakës emigruan në vitin 1990 për në Zvicër. Një vit më vonë, ata lindën djalin e tyre të madh, Taulantin, në Bazel. Ndërsa Graniti, lindi 18 muaj më pas.

Graniti thotë se Taulanti i ka ngjarë më shumë babait të tij me karakter.

Taulant dhe Granit Xhaka

Xhaka flet edhe për ambientimin në Londër, teksa aktivizohet me Arsenalin.

“Kam gjetur disa shqiptarë me të vërtetë të mirë këtu. Makinën e çoj për ta larë tek ta, pasi janë pronar autolarjesh. Bisedojmë për futboll, pasi ka edhe konkurrencë.

Graniti pjesë e Arsenalit

“Disa prej tyre janë me Liverpoolin, Manchester Unitedin apo edhe Arsenalin. Bëjmë shumë shaka”, ka thënë Xhaka.

Futbollisti shqiptar tregon se është i thjeshtë në jetë dhe shoqërohet shumë me njerëz.