Kjo është koha më e përshtatshme për të përgatitur këtë tortë pasi pjeshkët janë në kohën e tyre më të mirë.
Përbërsit për 8 persona
Për brumin frolla:
400 gr miell
3 të verdha veze
1 lugë e vogël sodë buke
100 gr sheqer pluhur
120 gr gjalpë i ftohtë
Për mbushjen:
rreth 800 gr. pjeshkë
150 gr. sheqer i kaftë
1 limon
Përgatitja
Përgatisni brumin frolla dhe ndajeni në dy pjesë. Një pjesë vendoseni në frigorifer te pjesa e freskët dhe tjetrën vendoseni te ngrirja.
Përgatisni mbushjen e tortës.
Pastroni pjeshkët nga lëkura dhe pritini në copa të vogla. Vendosini të gatuhen në një enë me fund të trashë me sheqerin dhe lëngun e limonit dhe 1 gotë ujë. Lërini të gatuhen ngadalë ngadalë sikur të bëni një reçel. Kur pjeshkët të zbuten dhe lëngu të jetë trashur, hiqeni dhe lëreni të ftohet.
Hapni me ndihmën e një letre furre brumin që keni lënë te pjesa e freskët. Torta është për një tavë torte me diametër 20 cm. Llogariteni ta hapni petën dhe pak me të madhe se duhet të vishen dhe anët e tortierës. Hidhni në mes mbushjen me pjeshkë
Merrni brumin frolla që kemi lënë në ngrirje dhe me anën e një rendeje, grijeni sipër tortës duke mbuluar gjithë sipërfaqen e saj.
Vendoseni të piqet në furrën e nxehur më parë në 180° për 30 minuta.
Lëreni të ftohet paksa dhe shërbejeni. Kjo tortë është shumë e përshtatshme dhe për mëngjes.