Trajneri i skuadrës verdhekuqe në konferencën për shtyp përpara sfidës ndaj Liverpoolit u shpreh me bindje se skuadra e tij në Olimpico do të përpiqet të përsërisë të njëjtin rezultat si ndaj Barcelonës, transmeton Super Sport.
“Ne dëshirojmë të realizojmë një tjetër përmbysje të madhe. Liverpooli është një skuadër e ndryshme krahasuar me Barcelonën, dhe duhet të tregohemi shumë të vëmendshëm. Salah? Nuk do të vendosim tre lojtarë që të mbulojnë vetëm atë. Megjithatë ne kemi Dzekon, ai do të marrë përgjegjësitë mbi supe dhe besoj se do të udhëheqë skuadrën drejt një tjetër përmbysjeje të pabesueshme. Pastaj është edhe Naiggolan. Radja ka thënë që do të shënojë edhe ai”, deklaroi Eusebio Di Francesco duke u shfaqur shumë optimist për një kualifikim të mundshëm të Romës së tij në finalen e Champions League.
