Kërkesa e kryeministrit për dorëheqje do të realizohet, deklaroi për PlusInfo drejtori i Burgut të “Shutkës”, Gjoko Kotevski pasi kryeministri i Maqedonisë, Zoran Zaev në një deklaratë për media kërkoi dorëheqje të drejtorit Kotevski pas incidentit në burg ku janë rrahur ish-ministrat, Mile Janakieski dhe Spiro Ristovski.
“Kërkesa e kryeministrit do të realizohet. Shpresoj se do të ketë hapësirë ta përfundoj hetimin dhe sa të tregohen të gjitha lëshimet të cilat tashmë i kemi parë dhe më pas do të realizohet kërkesa e kryeministrit”, deklaroi Kotevski.
Përndryshe, dy ish të ministrat që akuzohen për organizim të sulmit të përgjakshëm të “27 Prillit”, Mile Janakieski dhe Spiro Ristovski, të cilëve u është shqiptuar masa e paraburgimit 30-të ditor në Burgun e Shutkës, janë sulmuar fizikisht në burg.
Drejtori i burgut të Shutkës, Gjoko Kotevski, ka njoftuar se gjatë kohës së shëtitjes së rregullt, të Janakieskit dhe Ristovskit ka ardhur deri tek incidenti verbal mes personave S.R dhe Ll.K i cili më vonë ka kaluar në sulm fizik i cili menjëherë është ndërprerë nga shërbimet e burgut të Shkupit. Rreth orës 13:40 ka ardhur deri tek incidenti i dytë mes personave M.J dhe E.K i cili incident gjithashtu prej verbal ka kaluar në sulm fizik, shumë shpejtë është ndërpre nga shërbimet e burgut./Portalb/
