Hoxhaj: Haradinaj do të lirohet, kam biseduar me ministrin e Francës

Ministri i jashtëm i Kosovës, Enver Hoxhaj, në senacën e jashtëzakonshme që po mbahet për liderin e AAK-së, Ramush Haradinajn, ka thënë se MPJ është angazhuar maksimalisht për lirimin e tij, raporton Zëri.info.

Hoxhaj më tej, ka thënë se ai personalisht ka biseduar me të parin e AAK-së nëpërmjet telefonit.

“Të mërkurën kur ka ndodhur arrestimi nga ora 3 e pasdites deri në orën 19 unë kam telefonuar disa herë zotëri Haradinaj”, ka deklaruar ai.

Ndërkohë, pos kësaj, Hoxhaj ka thënë se ka biseduar edhe me homologun e tij nga Franca, me ç’rast siç ai është shprehur, Francës i është theksuar edhe njëherë qëndrimi i Kosovës karshi këtij rasti.

“Më 4 e 6 janar kemi bërë disa kërkesa për lirimin e tij. Po ashtu, kam pasur një telefonatë të gjatë me ministrin e Francës, ku ia kam shpjeguar qëndrimin e prerë të Kosovës. Dhe se si fletarrestet e tilla janë të papranueshme”, ka potencuar ai.