Ish-basketbollisti i NBA: Kobe Bryant dëshironte të vdiste i ri

Ish-basketbollisti i NBA që tani është në “Hall of Fame”, Tracy McGrady, e komentoi vdekjen e Kobe Bryant, duke treguar se si ky i fundit gjithmonë i kishte thënë se dëshironte të vdiste i ri.

Tracy McGrady, i cili u pensionua nga karriera e tij si basketbollist në vitin 2013, e bëri të ditur këtë deklaratë të Kobe Bryant të hënën, gjatë emisionit “The Jump” të ESPN.

“Kjo tingëllon e çmendur, por Kobe fliste kështu. Ai gjithmonë e thoshte këtë gjë”, i tha 40-vjeçari gazetares së ESPN, Rachel Nichols, e cila dukej e befasuar.

“Ai e thoshte gjithmonë këtë: dua të vdes i ri””, shtoi McGrady, përderisa e fshiu një lot nga faqja.

Bryant, sipas McGradyt, gjithashtu kishte thënë: “Dua të bëhen i pavdekshëm përmes karrierës time. E dini, dua të kem karrierë më të mirë sesa Michael Jordani dhe pastaj dua të vdes i ri”.

McGrady tha se mësoi për vdekjen e Bryant të dielën, përderisa po vallëzonte me vajzën e tij në një event për bashkëshortën e tij.

“Ata erdhën dhe ma dhanë lajmin dhe unë thjesht s’mund ta besoja. Si të gjithë të tjerët, por… jam i shkatërruar”.

Bryant, 41-vjeçar, vdiq të dielën në mëngjes, bashkë me vajzën e tij 13-vjeçare Gianna dhe shtatë persona të tjerë, kur helikopteri u rrëzua në Calabasas të Los Angelesit.

SHPËRNDAJE