Ballina Lifestyle Ja ushqimet që ju prishin humorin

Ja ushqimet që ju prishin humorin

Emily Edison, dietologe dhe nutricioniste sportive në Siatëll të Shteteve të Bashkuara të Amerikës, thotë se ka një lidhje të madhe mes ushqimit dhe humorit. Nëse hani ushqime të pashëndetshme, me shumë mundësi do të keni probleme me depresionin.

Ja kush janë, sipas saj, ushqimet që ju prishin humorin:

1. Karbohidratet e përpunuara

Në vitet e fundit, karbohidratet janë bërë armik për shkak se ju dhjamosin dhe nuk kanë shumë vlera ushqimore. Shkencëtarët e Universitetit të Kolumbias morën të dhëna nga 70 000 femra dhe panë se karbohidratet e përpunuara rrisnin sheqerin në gjak dhe ky sheqer i tepërt rriste nga ana e tij rrezikun e depresionit. Po në këtë studim u pa se drithërat integrale ulnin rrezikun e depresionit.

2. Sheqeri

Nga studimi mbi karbohidratet, shihet qartë se sheqeri duhet konsumuar sa më pak të jetë e mundur. Një dietë plot sheqerna rrit nivelin e inflamacionit në trup dhe tru, duke rritur rrezikun e depresionit. Një studim i publikuar në “JAMA Psychiatry” gjeti se inflamacioni i trurit ishte 30% më i lartë te pacientët me depresion.
“Sheqeri është në rrënjë të inflamacionit kronik. Duke konsumuar ushqime antiinflamatore keni më shumë mundësi për të përmirësuar humorin”, thotë Edison.

3. Yndyrnat

Të gjithë kemi lexuar për vetitë e mira të vajit të ullirit, por, vajrat e tjerë të përpunuar mund të rrisin rrezikun e depresionit me 48%, sipas një studimi të publikuar në “PLOS ONE”.

4. Ushqimet e përpunuara

Ushqimet e përpunuara përmbajnë gjithçka renditëm më sipër, kështu që është e sigurtë që do ju prishin humorin. Ndërkohë që studimet mbi dietën dhe depresionin zakonisht përqendrohen në ushqime specifike, një studim i publikuar në “British Journal of Psychiatry” vëzhgoi mbi 3000 persona dhe zbuloi se ata që hanin më shumë ushqime të përpunuara përballeshin me një rrezik të shtuar depresioni.

SHPËRNDAJE