„Deri dje e kanë pështyrë Ivanoviqin, e kanë quajtur egërsië dhe tradhëtar, ndërsa tani e varrosin si qytetar me merita. Nuk mund të veprohet kështu, njerëzit nuk janë kafshë“, thotë politikani Marko Jakshiq për DW.

Marko Jaksic (J. Đukić-Pejić)
DW: Zoti Jakshiq, deri tani ka vetëm shumë spekulime dhe pak të dhëna. Disa ministra serbë thonë se vrasja e Oliver Ivanoviqit do të zbardhet. Po ju, çfarë mendoni?

Marko Jakshiq: Duke pasur parasyshë përvojat e deritanishme, mendoj se do të jetë shumë vështirë që rasti të zbardhet. Në Mitrovicë, prej ardhjes së Vuçiqit në pushtet, në pesë vitet e fundit, janë djegur rreth 100 vetura, është regjistruar një numër i madh sulmesh me armë zjarri, është djegur madje edhe makina ime… Unë edhe vet e kam pyetur Vuçiqin në Mitrovicë: „A ma ke djegur ti makinën time, pasi ti kontrollon të gjitha shërbimet sekrete. Unë nuk mund të them se kush i ka djegur. Por Mitrovica është e vogël dhe ti e ke obligim të ma thuash se kush e ka djegur.”

Për fat të keq, kanë kalur gati pesë vite dhe kjo vepër nuk është zbardhur. Nuk kam shumë shpresa se do të zbardhet ndonjëherë. Siguria në këtë pjesë ka qenë shumë më e madhe kur e ka kontrolluar gjendjen Ministria e Punëve të Brendshme e Serbisë, para intergrimit të tyre në Policinë e Kosovës. Kontrollet janë bërë nga persona me veshje civile. Tani kemi shumë uniforma, por rezultatet janë të dobëta. Shumë sulme me armë zjarri nuk janë zbardhur. Kam frikë se as ky sulm nuk do të zbardhet.

Varrosjen e Ivanoviqit e kanë shoqëruar mijëra qytetarë, ndërsa në zgjedhjet e fundit për kryetar bashkie në Mitrovicë, ai ka fituar vetëm 1.462 vota. Si shpjegohet kjo?

Marko Jakshiq: Ka pasur miq të cilët vërtet kanë shprehur keqardhje, por kjo ka qenë më shumë se një një lloj proteste. Kjo është protestë për shkak të gjendjes së mungesës së shpresës në Mitrovicë. Mitrovica është shndërruar sot në Kolumbi, një vend jashtëzakonisht i rrezikshëm për jetën. Ka pasur edhe rrahje masive për Krishtlindje. Mendoj se njerëzit e pakënaqur janë mbledhur këtu për të shprehur protestën e tyre.

Nga ana tjetër, nuk mund t’i ikësh bindjes se pushteti në Beograd e ka shndërruar Ivanoviqin në një objektiv sulmi. A qëndron pushteti i tanishëm pas sulmit apo jo, do ta tregojë hetuesia, ndonëse kam frikë se rasti nuk do të zbardhet kurrë. Ta kujtojmë vetëm deklaratën e presidentit të Serbisë: ‘Oliveri Ivanoviqi duhet të thotë se kush e ka vrarë këtë apo ate person’. Ai e ka fajësuar Ivanoviqit për vdekjen e shumë njerëzve. Ndaj ata duhet ta bartin në shpirtin e tyre vrasjen e Ivanoviqit, e kanë shndërruar në një objektiv në këmbë…’

Unë nuk jam bashkmendimtar i Ivanoviqit, por populli ynë thotë „rri shtrembër e fol drejt “, ndaj më duhet të them se është tepër shqetësuese kur dëgjon rrëfimet për Ivanoviqin, me të cilin në periudhën prej vitit 1999 – 2001, kemi mbrojtur së bashku këtë qytet dhe jemi shoqëruar. Ndaj më vjen shumë keq kur dëgjoj gjërat që fliten kundër tij.

Në kuadër të fushatës kundër Ivanoviqit, drejtori i Zyrës së Serbisë për Kosovën, Marko Gjuriq ka deklaruar se ata që votojnë për Oliver Ivanoviqin, votojnë kundër Serbisë. Si e komentoni këtë deklaratë?

E vërtetë, kështu ka deklaruar Marko Gjuriq, por kështu ka folur edhe Aleksandar Vuçiq. Marko Gjuriqi vetëm përsëritë ate që thot shefi i tij. Aleksandar Vuçiq ka deklaruar në televizionin shtetëror në Serbi: ‘Oliver Ivanoviqi duhet ta thotë se kush e ka varë Millosh Shqepanoviqin’. Këtë e ka përsëritur shumë herë. Mendoj se pushteti (në Serbi), me apo pa vetëdije, e ka shndërruar Ivanoviqin në një objektiv.

Shumëkush flet për gjendjen në veri, por shumë pak njerëz flasin me emra. Rada Trajkoviq ka deklaruar se zotëruesi i gjendjes në veri ësthë Milan Radojiçiq. Si e shihni ju këtë gjendje?

Kam dëgjuar për këtë deklaratë, por nuk mund ta them se cila është e vërteta. Nuk kam dëshmi. Por ajo që mund të them është, se siguria e serbëve këtu është shumë e keqe. Presidenti ynë (Vuçiq) kryeson edhe katër shërbime të sigurimit në Serbi dhe mendoj se është e turpshme për këtë pushtet që nuk i bën publike të dhënat për këto vrasje, faktet dhe fajtorët. Ajo që kam dëgjuar nga burime jo zyrtare është se Oliveri seriozisht ka pasur frikë për jetën dhe ka shkuar tek presidenti dhe i ka tregaur disa emra. Nuk kam qenë prezent në këtë bisedë, por në qytet flitet se Oliveri ia ka treguaar emrat e personave nga të cilët rrezikohej. Për fat të keq, nuk është bërë asgjë dhe tani po shohim se çfarë ndodhi.

Ivanoviqi ka paralajmëruar disa herë se serbët e Kosovës kanë frikë nga personat që po shetisin me makina pa targa nëpër Mitrovicë, dhe se bëhet fjalë për ndërlidhjen e krimit dhe politikës… çfarë dini për këtë?

Këtu ka pasur njësi të tëra që kanë shkuar në kohën e zgjedhjeve dhe kanë bërë presion ndaj qytetarëve se si duhet të votojnë. Stili i veprimit është ky: kur mbahen zgjedhje diku tjetër, atje shkojnë serbët e këtushëm dhe kryejnë punë për pushtetin, ndërsa kur ka zgjedhje këtu, vijnë nga qytete të tjera.

Ky është fatkeqësisht sistemi i hordhive që ka instaluar ky sistem. Më parë nuk ka ekzistuar kjo infrastrukturë, që nuk është karakteristike vetëm për Mitrovicën, por ekziston edhe në Kragujevc, Krushevc dhe në qytete të tjera… për fat të keq, Serbia është shndërruar në një shtet mafioz. Me parë nuk ka qenë e këtillë, por me këtë regjim, është futur një sistem i këtillë dhe tani po i shohim viktimat.

Ju keni thënë se dhuna në vendbanimet me shumicë serbe ka shkallëzuar në vitin 2013, kur janë shënuar edhe më shumë vrasje… pse pikërisht në atë kohë?

Pikërisht për faktin se Aleksandar Vuçiqi ka krijuar një sistem gjysmë mafioz, jo vetëm në Kosovë por në të gjithë Serbinë. Njerëzit kanë frikë, frika është futur në kokën e të gjithëve në vend. Gati të gjithë flasin me gjysmë zëri. Kjo nuk ka ekzistuar madje as në kohën e Millosheviqit. Ky është një sistem pushteti ku ai shërbehet me parimet dhe metodat mafioze të Cosa nostra. Njerëzit kanë frikë të flasin, e nëse flasin, mund të përfundojnë si Oliver Ivanoviqi.

Këto ditë Mitrovicën do ta vizitojë presidenti Vuiçiq, si e përjetoni këtë vizitë?

Presidenti vjen këtu për të shpëlarë të gjitha që ka përzier vet. Deri dje ka folur për vrasje me motive politike, e tani flet ndryshe. Në esencë, këtu shihet një politikë jo parimore. Nuk duhet harruar se ai e ka mbështetur edhe pushtetin e Ramush Haradinajt dhe se lista e tij Srpska e ka votuar Kadri Veselin kryetar të Parlamentit. Me votat e listës Srpska është vutar president Hashim Thaçi. Kjo është një politikë që jo vetëm ndanë Kosovën nga Serbia, por e shndërron Kosovën në një fole të vërtetë mafioze. Pushteti i tanishm ka raporte të ngushta edhe me pushtetin mafioz në Mal të Zi, e ky virus po përhapet.

Aleksandar Vuçiqi kaherë e ka zgjidhur në kokën e tij çështjen e Kosovës. Ai po përpiqet të mbajë vetëm veriun e Kosovës, nëse është e mundur, por mendoj se nuk do t’ia dalë. Politika mafioze dhe kriminale është thelluar tepër, për të mundur të bëhet ndarja sipas parimit – ti më jep këtë pjesë, unë të jap atë tjetrën. Unë mendoj se deri sa Vuçiqi është në pushtet në Serbi, Kosova do të largohen gjithnjë e më shumë nga Serbia. Ardhja e tij këtu është përpjekje për të amnistuar vetveten për këtë që po ndodhë në veri të Kosovës.

Deri dje e kanë pështyrë Oliver Ivanoviqin, e kanë quajtur bishë, shkatërrues të shtetit dhe tradhëtar, e tani e varrosin në Alenë e qytetarëve të merituar. Ky lloj sarkazmi dhe kjo sjellje dëshmon të gjitha. Nuk mund të punohet kështu, sepse njerëzit nuk janë kafshë – që ti pështyni dhe ti shkelni. Që ti shndërroni në objektiva të gjallë, e më pas ti bëni hero dhe qytetarë të merituar. Kjo është në një nivel tepër të ulët.

Intervistoi Jelena Djukic-Pejic

*Marko Jakshiq është anëtar i kryesisë së lëvizjes së serbëve në Kosovë „Otadžbina” (Atdheu). Më parë ka qenë anëtar i delegacionit negociator të Serbisë në biseimet me Kosovën (2006.-2008.), nënkryetar i Partisë Demokratike të Serbisë dhe deputet i saj në Parlamentin e Serbisë.