Kameramani i ri sirian Khaleed Khateeb, i cili me filmin “Helmetat e Bardha” (The White Helmets) u nominua për çmimin e sivjemë Oscar, nuk u lejua të udhëtojë në ndarjen e çmimit prestigjoz në SHBA, raporton Anadolu Agency (AA).

 

Khateeb (21) duhej të nisej nga Stambolli për në Los Angeles, të dielën, më 26 shkurt, për të marrë pjesë në ndarjen e çmimit Oscar. Filmi “Helmetat e Bardha” u nominua për “Statujën e Artë” në kategorinë e dokumentarit më të mirë të shkurtër.

Por, Khateeb nuk arriti të udhëtojë për Los Angeles. Ai në profilin e tij në Twitter shkroi se pasi që ka kaluar tre ditë në aeroportin e Stambollit, edhe pse posedon vizë për SHBA, nuk i është dhënë ‘dritë e gjelbër’ për të fluturuar drejt Los Angeles-it.

 

Ndërkohë, agjencia Associated Press raporton se Departamenti për Sigurinë e Brendshme të SHBA-ve në momentin e fundit ka penguar ardhjen e tij në Los Angeles.

Filmi “Helmetat e Bardha” është një film në lidhje me “mbrojtjen civile siriane”, pra për operacionet e shpëtimit të civilëve nga sulmet ajrore të regjimit siria dhe forcave ruse.