Këshilltari i Presidentit të Republikës së Kosovës, Hashim Thaçi, Adil Behramaj ka reaguar ndaj kryeministrit Avdullah Hoti për shkuarjen e tij në Bruksel, për vazhdimin e dialogut në mes Kosovës dhe Serbisë.

Behramaj përmes një statusi në rrjetin e tij social në Facebook ka shkruar se Hoti nuk mund ta përfaqësojë as LDK-në, se lëre më Kosovën, e sipas tij si i vetëm nuk e përfaqëson dot as fshatin e tij.

Ai ndër të tjera ka thënë se kryeministri Hoti nuk është koordinuar asnjëherë me presidentin Thaçi.

Lexoni më poshtë reagimin e Behramajt:

A e dini kush pse ka shkuar sot Avdullah Hoti në Bruksel dhe çfarë po kërkon atje? Pa mandat të Kuvendit. Pa unitetit dhe konsensus politik. Pa platformë të dialogut. Pa transparencë publike. Pa grupin e ekspertëve. Pa koordinim dhe pëlqim të partnerëve qeverisës.

Avdullah Hoti nuk mund ta përfaqësojë as LDK-në, se lëre më Kosovën. Si i vetëm nuk e përfaqëson dot as fshatin e tij!

Në ditën kur presidenti i vendit po intervistohet për shpifjet e regjimit serb, Avdullah Hoti ka zgjedhur t’i zgërdhihet Vuçiqit në Bruksel. Ky paska qenë ekipi i unitetit për të cilin na fliste!

Që nga 24 qershori kur u anulua takimi i Uashingtonit për shkak të publikimit të çuditshëm të propozim-aktakuzës nga Zyra e Prokurorit të Specializuar, Avdullah Hoti nuk e ka thënë as një fjalë të vetme në përkrahje të presidentit, ndonëse ai gjeti kohë ta uronte edhe Liverpoolin.

Edhe pse distanca në mes Zyrës së Presidentit dhe Zyrës së Kryeministrit nuk është as 50 metra, ai nuk e mori mundin më asnjëherë që të vinte dhe ta takonte. Jo vetëm për t’u koordinuar, por as për ta shprehur një solidaritet krejtësisht njerëzor!

Nuk e paskemi ditur, por Avdullah Hoti qenka tërësisht i amputuar nga ndjenjat e patriotizmit.