Kocijançiq: Javët në vijim, kyçe për Maqedoninë

Brukseli përsëri u ka bërë thirrje liderëve të katër parive më të mëdha në vend, nënshkruese të marrëveshjes së Përzhinës, që të ulen në tavolinën e bisedimeve dhe të sigurojnë kusht për zgjedhje të lira dhe të besueshme. Zëdhënësja e Komisionit Evropian, Maja Kocijançiq, ka theksuar se javët në vijim janë kyçe për Maqedoninë duke shtuar se në BE ekziston një pajtueshmëri e qartë se marrëveshja e Përzhinos duhet të zbatohet, duhet të forcohet sundimi i ligjit, të mbështetet puna e PSP-së, si edhe të zbatohen reformat parësore.

“Këshilli për Punë të Jashtme ka biseduar për situatën në Ish Republikën Jugosllave të Maqedonisë. Ashtu siç theksoi përfaqësuesja e lartë për politikë të jashtme e BE-së, Federika Mogerini, ekziston pajtueshmëri e qartë mes shteteve anëtare për nevojën që liderët partiak në vend të lidhin dialog të hapur, të implementohet Marrëveshja e Përzhinos, të krijohen kushte zgjedhje të besueshme, të zhvillohet sundimi i ligjit, të përkrahet puna e Prokurorisë Speciale dhe të implementohen reformat prioritare”, ka deklaruar, zëdhënësja e Komisionit Evropian, Maja Kocijançiq.

Kocijançiç nuk ka saktësuar nëse në debatin në Luksemburg është disuktuar për sanksione ndaj Maqedonisë, edhe pse është përmendur kundërshtimi i diplomatit grek Kotzias ndaj sanksioneve të mundshme.