Drejtori i Byrosë për Siguri Publike, Laze Vellkovski, do të mbetet në Ministrinë e Punëve të Brendshme, edhe nëse qeveria në seancën e nesërme pranon propozimin për shkarkimin e tij.

Kryeministri Zoran Zaev sot tha se Vellkovski është i rëndësishëm për shërbimet e sigurisë dhe një nga bashkëpunëtorët e tij të parë, si dhe ministrit Oliver Spasovski, përcjell Telegrafi Maqedoni.

“Vellkovski e ka bërë gabimin i arsyetuar nga kërcënimet ndaj tij dhe familjes së tij. Qeveria nesër do ta rishikojë propozimin për shkarkimin e tij dhe do të sjell vendim. Nuk kemi menduar kush do ta zëvendësojë atë nëse propozimi pranohet, sigurisht do të na duhet kohë për vendimin”, tha Zaev.

Ai shtoi se për një vit dhe dy muaj sa ekziston qeveria, janë shkarkuar më shumë se 20 persona dhe se kush gabon do të përgjigjet.

MPB njoftoi se drejtori Laze Velkovski gjatë festës së Ilindenit, pa vendim me makinën zyrtare, ka dërguar vajzën e tij në Greqi.