Partitë e mëdha politike përfundimisht do të garojnë të vetme në zgjedhjet e 14 Shkurtit. Të martën në orën 18:00 ka qenë edhe afati i fundit për partitë politike që kërkojnë certifikim por për koalicion janë paraqitur vetëm dy parti të komuniteteve.
Partitë e mëdha synojnë që të garojnë të vetme apo ndonjë parti e vogël të shkrihet në listat zgjedhore të partive më të mëdha. Ende është e paqartë se si do të garojë në këto zgjedhje Vjosa Osmani e cila aktualisht është duke kryer detyrën e presidentes së vendit.
Ndryshe nga partitë tjera që kanë nominuar kandidatët për kryeministra në këto zgjedhje, Aleanca për Ardhmërinë e Kosovës nuk ka një kandidat të tillë. Në krye me Ramush Haradinajn kjo parti synon postin e presidentit.
Haradinaj thotë se AAK ka program qeverisës për ekonominë, ndërsa nuk ka vija të kuqe për asnjë parti për koalicion paszgjedhor.
Zgjedhjet e parakohshme në Kosovë mbahen më 14 Shkurt pasi gjykata kushtetuese e shpalli jolegjitime votën e deputetit Et’hem Arifi e cila ishte vendimtare për zgjedhjen e qeverisë Hoti.
https://youtu.be/b05ehPcio0
