Pas zyrtarizmit të bartësve të listave zgjedhore nga Lëvizja BESA, u plotësua mozaiku i bllokut të partive shqiptare me garuesit e tyre në gjashtë njësitë zgjedhore dhe në atë të diasporës, shkruan Portalb.mk.
Gara më e “nxehtë” mes partive politike shqiptare do të zhvillohet në njësinë zgjedhore numër gjashtë, në të cilën do të përballen krerët e BDI-së, Ali Ahmeti, PDSH-së, Menduh Thaçi, LR-PDSH-së, Ziadin Sela dhe Lëvizjes BESA, Bilall Kasami.
Në njësinë numër dy bartës liste nga radhët e BDI-së do të jetë Ejup Halimi, kundër tij, nga PDSH, do të jetë Orhan Ibrahimi dhe ai i Lëvizjes BESA Afrim Gashi, ndërkaq LR-PDSH, UNITETI dhe RDK-ja e Vesel Memedit, deri në mesnatë do të vendosin për garuesin e tyre.
Në njësinë zgjedhore numër tre, nga radhët e partive shqiptare, do të përballen vetëm partitë BDI me Nafi Durmishin dhe PDSH me Sami Rushitin, ndërkaq njësia numër katër do të ketë vetëm një bartës liste nga partitë shqiptare, Artin Spahiun e BDI-së.
Bartës liste në njësinë numër pesë nga radhët e BDI-së do të jetë, Agim Shaqiri, i PDSH-së është Ardian Huseini, LR-PDSH-ja e ka zyrtarizuar Syrja Rushitin si bartëse të listës, ndërkaq Lëvizja BESA, anëtarin e saj të ri, Arben Labënishti.
Tani për tani, njësia numër shtatë, apo ajo e diasporës, do të përfaqësohet nga partitë shqiptare vetëm nga kandidati i BDI-së, Xhevdet Spahiu, transmeton Portalb.
Përndryshe, në mesnatë përfundon afati për dorëzimin e listave të kandidatëve për zgjedhjet e parakohshme parlamentare të caktuara për 11 dhjetor. Partitë politike, përveç VMRO-DPMNE-së, në opinion i publikuan bartësit e listave për gjashtë njësitë zgjedhore, por tani për tani asnjëra prej tyre nuk ka dorëzuar lista deri te Komisioni Shtetëror Zgjedhor (KSHZ).
Listat e kandidatëve duhet të shqyrtohen dhe konfirmohen nga anëtarët e KSHZ-së në afat prej 48 orëve nga momenti i dorëzimit gjegjësisht deri te dielën në mesnatë. Përderisa konstatohen parregullsi, pjesëmarrësit në zgjedhje duhet t’i largojnë në afat prej 48 orëve. Shorti për orarin e listave duhet të mbahet më 20 nëntor.
Njëkohësisht në mesnatë përfundojnë edhe afatet për kontrollin publik në Listën zgjedhore, për paraqitjen e shtetasve të Republikës së Maqedonisë për votim jashtë vendit dhe për ripërtëritjen e të drejtës zgjedhore të personave me regjistrime kontestuese pas kontrolleve të fundit në terren dhe kontrollet administrative të Listës zgjedhore.
Sipas mesatares së Komisionit Shtetëror Zgjedhor, deri dje në orën 14:00 janë paraqitur 16.720 shtetas të Maqedonisë për votim të cilët jetojnë jashtë vendit nga të cilët 14.156 janë pranuar, janë refuzuar 208, ndërsa në përpunim janë 2.356.
Në lidhje me 29.858 regjistrime kontestuese pas kontrolleve të fundit në terren dhe administrative të Listës zgjedhore, për rregullimin e të drejtës zgjedhore kanë aplikuar 1.043 qytetarë. KSHZ-ja ka pranuar 1.005 aplikime, përderisa 38 janë në përpunim. Deri nesër në mesnatë është afati i fundit që këta persona ta rregullojnë të drejtën e tyre zgjedhore.
Listën zgjedhore KSHZ-ja duhet ta nënshkruajë më 27 nëntor.
