Nuk është hera e parë që në këtë rubrikë lexoni receta për flokët, fytyrën e trupin të përgatitura me produkte që i keni në shtëpi. Ndaj edhe këtë herë po ju sjellim një ide të re. Pastrues fytyre me oriz. Po, mirë e lexuat! Kështu që herën tjetër që do të përgatisni oriz për drekë, mos e hidhni ujin, sepse me mënyrën që do ju tregojmë më poshtë mund ta përdorni për të pastruar fytyrën.
Uji i orizit është i pasuruar me vitamina e minerale, të cilat kanë efekt pozitiv në flokë e lëkurë. Madje sipas historisë, femrat në Kinë e Japoni bënin dush me ujin që pastronin orizin.
Ja si mund të realizoni pastruesin tuaj.
Do ju duhen:
Gjysmë filxhan oriz
2 filxhanë ujë
Fillimisht shpëlani orizin me ujë të pastër. Më pas vendoseni orizin në një enë bashkë me 2 filxhanët e ujit dhe lereni për 15-30 minuta. Përziejeni vazhdimisht derisa uji të fillojë të zbardhet. Me këtë lëvizje ai do të nxjerrë gjithë vitaminat e mineralet në ujë, duke krijuar një pastrues natyral për lëkurën dhe flokët tuaja.
Më pas mbani vetëm ujin dhe vendoseni në një vazo, ku mund ta ruani deri në 1 javë.
Si ta përdorni:
Me një copë pambuk që më parë e keni lagur me këtë ujë, bëni lehtësisht masazh për pak minuta. Më pas lereni lëkurën të thahet vetë.
Pas disa përdorimesh do të shikoni që lëkura do të bëhet më e butë dhe plot ndriçim. Mund ta përdorni çdo ditë si pjesë të pandashme të rutinës ndaj kujdesit të lëkurës.
