Projekt i parealizuar dhe rrugë të shkatërruara në Çair

Banorët e komunës së Çairit vazhdimisht ankohen për rrugët e shkatërruara të kësaj komune, dhe thonë se vetëm në këtë pjesë të Shkupit, projektet stërzgjaten në këtë mënyrë.

Gjegjësisht bëhet fjalë për rrugën Xhon Kenedi në komunën e Çairit në të cilën vitin e kaluar filluan punimet për ndërtimin e rrjetit atmosferik të cilat duhej përfunduar qysh shtatorin e vitit që lamë pas.

“Vetëm te neve stërzgjaten kështu projektet, aq sa nuk iu mbet fytyrë funksionarëve të dalin e të përurojnë, po sa të pa fytyrë janë edhe këtë e bëjnë. Na u shkatërruan makinat, rrugët i kanë mbushur me gropa, askush nuk e din se kur do të mbulohen”, tha Lulzim I.,banor.

Rruga "Xhon Kenedi"

Rruga “Xhon Kenedi”

“Këta fillojnë kinse të rregullojnë diçka por përveç që nuk rregullohet asgjë, edhe më shumë shkaktohet dëm. Nuk e di sa sa kohë u duhet këtyre që të instalojnë një rrjet atmosferik, e të rregullojnë një rrugë?! Kjo nuk ndodh askun pos në Çair”, tha Faik O., banor.

Gjithashtu edhe aktivistja e OJQ Duam Çair të Pastër, Valbona Reka komentoi këtë projekt të papërfunduar në profilin e saj në Facebook.

“Nuk ekziston banor i Çairit që nuk kalon nëpër rrugën “Xhon Kenedi” të kësaj lagje. Po ti o kryetar i komunës, Izet Mexhiti a ec ndonjëherë këtej!? Mirë, ndoshta ti nuk ec, sepse ti je i “madh” dhe nuk të shkon ecja. Po, a e ngasish veturën këtej, në këtë rrugë ndonjëherë!? Mirë, ndoshta dhe të vozisin e ti ashtu i ulur prapa në ulëset e rrehatshme nuk i ndjen dridhjet nga gropat dhe prej xhamave të errëta të veturës nuk e sheh derexhen e rrugës dhe kaosin e trafikut… Ja pra, unë po t’i përcjell pamjet. Po, përse ore kryetar me vite të tëra kjo rrugë nuk rregullohet!? A nuk sheh sesi në mënyrë ekspeditive dhe duke i respektuar të gjitha metodat e ndërtimit modern, rrugët nga ana e djathtë e Vardarit ndërtohen!? Së paku na jep llogari, është diskriminim buxheti shtetëror në pyetje!? Nëse kjo nuk është arsyeja, atëherë mbetet vetëm përfundim i parave të parapara (sepse çdo projekt fillohet me buxhet të saktë për projektin)…nëpër xhepa të hajnave, të atyre që as pikën e idealit për civilizim të shoqërisë tonë nuk e kanë….
Fole naj fjal, o Izet Mexhiti!!!
p.s. që të mos e theni veturën këtu te udhëkryqi (foto 1) duhet të bëni asi lloj “ekzibicioni”, të jeni të lumtur nëse shpëtoni pa u aksidentuar”, shkruan Reka.

Rruga "Xhon Kenedi"

Rruga “Xhon Kenedi”

Ndërkaq kohë më parë të kontaktuar nga Portalb, nga komuna e Çairit thanë se këtë projekt e financon Qyteti i Shkupit dhe se ata duhet të japin përgjigje se kur pritet të përfundojë i njëjti.

Nga Qyteti i Shkupit, i cili është edhe realizues i këtij projekti kohë më parë thanë për Portalb, se po punohet mirëpo shkaku i kushteve atmosferike, punimet nuk kanë arritur të përfundojnë ashtu siç është parashikuar.

Rruga "Xhon Kenedi"

Rruga “Xhon Kenedi”

“Me këtë projekt i cili është në fazën përfundimtare, do të ndërtohet kanalizimi atmosferik me gjatësi prej 800 metrave në rrugët ‘Xhon Kenedi’ dhe ‘Kemal Ataturk’, me qëllim që të përmirësohet gjendja e ujërave atmosferik në Komunën e Çairit dhe kështu të zgjidhet problemi i kamotshëm i kësaj komune. Kompania që po merret me punimet premtoi që nëse kushtet atmosferike janë të mira, ky projekt do të ndërtohet në afatin e paraparë, mirëpo kjo gjë u prolongua shkaku i kohës me shi”, thanë për Portalb, nga Qyteti i Shkupit më 21 shtatorë të vitit 2016.

Rruga "Xhon Kenedi"

Rruga “Xhon Kenedi”

Ndërkaq për ndërtimin e kanalizimit atmosferik, Qyteti i Shkupit ndaj 23 milion denarë, dhe premtoi që pas përfundimit të projektit, i njëjti institucion do të merr përsipër edhe rregullimin e asfaltit të dëmtuar.

Për ndërtimin e kanalizimit atmosferik në rrugët “Xhon Kenedi” dhe “Kemal Ataturk” Qyteti i Shkupit do të investojë rreth 23 milionë denarë, ndërsa në terren do të punojnë ekipet e kompanisë “JU BAJ 2 AMET”.