”Rrugët e Maqedonisë” do të blejë automjete të reja për mirëmbajtjen e rrugëve

Ndërmarrja publike ”Rrugët e Maqedonisë” për gjysmë milion euro do të furnizohet me automjete për mirëmbajtje të rrugëve gjatë dimrit. Tenderi u shpall pasi vendi u përfshi nga të reshurat e borës, ndërsa një pjesë e madhe e rrugëve mbetën të papastruara dhe në to ende ka borë.

Sipas Alsat-M, kjo ndërmarrje do të blejë tre makina për hedhjen e kripës, katër thika metalike për pastrimin e borës, një makinë të përdorur për gërryerjen e asfaltit dhe nëntë kamionë të rinj. Tenderi do të realizohet me afate të shkurtuara.

Ofertat për furnizim me këto pajisje do duhet të dërgohen deri më 22 shkurt. Shtatë ditët e kaluara, qytetarët ishin të revoltuar për gjendjen e rrugëve dhe për mospastrimin e borës. Ndërmarrja Rrugët e Maqedonisë për 1.5 milion euro ka nënshkruar kontrata me tre kompani private për mirëmbajtjen e rrugëve gjatë dimrit. Njëra kompani është nga Tetova, e dyta është e regjistruar në fshatin Zajas dhe treta në Demir Kapi.