‘Kuqezinjtë’ kanë avansuar në 1/4 e Kupës së Maqedonisë pasi barazuan 0:0 me Rabotniçkin, ndërsa kalojnë më tej falë fitores 2:0 në ndeshjen e parë në Shkup. Tani vëmendja kthehet kah kampionati, ku të dielën në Tetovë pritet rivali më i madh për titullin, Vardari.
Fitorja e shënuar në takimin e parë të 1/8 së finales së Kupës kundër Rabotniçkit në Shkup është treguar deçizive për avansimin e Shkëndijës në raundin tjetër të kësaj gare, pasi në ndeshjen e kthimit në Tetovë skuadra kishte luksin të menaxhojë situatën pa harxhuar shumë energji.
Me epërsi 2:0 nga ndeshja e parë dhe me disa futbollistë të lënë të pushojnë dhe me formacion të kombinuar, sërish Shkëndija që nga fillimi diktonte tempon e lojës, por pa harxhuar shumë energji të shtypë me çdo kusht rivalin. Goditja e parë në kuadrant të njërës portë erdhi në minutën e 23-të kur Bozhinovski kontrolloi tentimin e Imerit. Pak më vonë Hasani provoi nga gjuajtja e lirë, mirëpo pa problem për portierin kundërshtar. Deri në fund të pjesës së parë miqtë kishin disa tentime të pasuksesshme, ndërsa ‘kuqezinjtë’ u kanosën përmes Zhuniorit dhe Bojkut me goditje nga distanca, mirëpo pa ndryshim në rezultat.
Në pjesën e dytë u luajt me të njëjtën tempo, ndërsa pas dy harkimeve regjistrojmë tentimet me kokë të Zhuniorit dhe Haberkonit, mirëpo Bozhinovski tregohet syçelë në portë. Në minutën e 84-t Ibraimi godet fortë vetëm skaj portës. Deri në fund nuk pati ndryshim dhe Shkëndija festoi kualifikimin në çerekfinale të Kupës, ku mbron vazhdon mbrojtjen e trofeut të fituar sezonin e kaluar në një finale pikërisht kundër Rabotniçkit.
SHKËNDIJA-RABOTNIÇKI 0:0 (0:0)
Stadiumi i qytetit në Tetovë
Shikues: 2 500
Arbitër: Stojançe Stojanov
Arbitra anësorë: Nikolla Karakolev dhe Orce Stefanovski
Delegat: Dobre Ivanov
Golashënues:
Karton i verdhë: Bojku (Shkëndija).
Karton i kuq: /
SHKËNDIJA: Zahov, Cuculi, Hasani (Ibraimi 65’), Imeri, Murati (Menendez 76’), Zhunior, Bojku (Totre 81’), Haberkorn, Pollozhani, Todorovski, Vujçiç.
Trajner: Bruno Akrapoviç
RABOTNIÇKI: Bozhinovski, Mitrev, Herera, Duranski, Siljanovski (Stojanov 78’), Tomash, Sahiti (Ivanovski 63’), Naumçevski, Ristovski (Stankovski 72’), Trajçevski, Rosho.
Trajner: Viktor Trenevski
