Autoritetet turke kanë krijuar një mjedis në favor të torturës pas tentativës së grushtit të shtetit në korrik, njoftoi sot raportuesi special i OKB-së duke shtuar se abuzimet ishin shtuar ndjeshëm pas grushtit të shtetit.

“Duhet vënë në dukje se tortura dhe format e tjera të keqtrajtimeve janë përhapur në ditët dhe javët që pasuan grushtin e dështuar të shtetit, kryesisht në momentin e arrestimit dhe gjatë ndalimit në paraburgim”, deklaroi raportuesi special i OKB-së në lidhje me torturën Nils Melzer.

“Ligjet dhe dekretet e miratuara së fundmi krijuan një mjedis të favorshëm për torturën”, theksoi ai në një konferencë shtypi në Ankara gjatë së cilës ai ndau konstatimet e para në përfundim të një vizite gjashtë ditore.

Pas grushtit të dështuar të shtetit më 15 korrik, presidenti Recep Tayyip Erdogan shpalli gjendjen e jashtëzakonshme dhe nënshkroi disa dekrete që mundësojnë zgjatjen e periudhës së paraburgimit në 30 ditë, ku pesë të parët mund të prangosen pa praninë e një avokati.