Kryetari i LSDM-së, Zoran Zaev për “Faktor” tha se për shkak të krizës, pritet një ulje e të ardhurave buxhetore për 60%, që mund të nënkuptojë një mungesë prej 2.2 miliardë eurosh në Buxhet.

“Edhe nëse shteti gjen 1.2 miliardë euro kredi, një miliardë euro do të duhet të sigurohen nga vendi përmes kursimeve. Prandaj, këto masa janë të nevojshme, përfshirë uljen e pagave të zyrtarëve, por edhe të të gjithë punonjësve në sektorin publik deri në pagën minimale prej 14.500 denarë”, tha Zaev.

Ai tha se qëllimi i masave tona është të parandalojmë humbjet e vendeve të punës, të parandalojmë që njerëzit të mos kenë të ardhura, të ngelin pa punë dhe pa ekzistencë dhe të mos rrezikojnë qëndrueshmërinë e buxhetit.

“E gjithë kjo situatë, së pari me shëndetin dhe më pas me krizën ekonomike të coronavirusit, nuk është e këndshme për askënd. Është e qartë se askush nuk dëshiron tu merren nga të ardhurat e tyre të rregullta mujore, por të gjithë duhet ta kuptojnë se me këtë barrën e mbajmë të gjithë, por njëkohësisht u ndihmojmë edhe atyre që nuk kanë përfitime për shkak të coronavirusit, të cilët rrezikojnë që mos të kenë asnjë të ardhur në muajt në vazhdim. Ne duhet të mendojmë për të gjithë, së paku edhe ato të marrin pagë minimale, që të kenë çka të shpenzojnë, të sigurojnë ushqim për vete dhe familjet e tyre”, deklaroi Zaev.

Ai mendon se tani është koha për solidaritet, të gjithë të ndihmojnë njëri tjetrin. Punëtori nga sektorit publik t’i ndihmojë punëtorit në sektorin privat, sepse administrata kryesisht financohet nga bizneset private.