Azir Aliu: Hapin e parë e kemi bërë tani koha për hapin e dytë, ta vazhdojmë këtë betejë për ne!

Gjatë këtyre ditëve të fundit kam marrë shumë thirrje dhe mesazhe ku shprehni gatishmëri për përkrahje, inkurajim dhe gatishmëri për t’u përfshirë në aktivitetet e ardhshme si pjesë e VLEN-it.
Meqenëse nuk mund t’u përgjigjem të gjithëve individualisht, dua t’ju falënderoj publikisht dhe të jem i hapur dhe i sinqertë, ashtu siç gjithmonë kam qenë:
Unë kurrë nuk do të flas keq për asnjë bashkëpartiak timin. Politika është një gjë, ndërsa marrëdhëniet njerëzore, respekti dhe betejat e përbashkëta janë diçka shumë më e thellë. Ato nuk shlyhen brenda natës.
Ju falënderoj për përkrahjen dhe besnikërinë që më keni shprehur. Nuk kërkoj besnikëri ndaj meje, as ndaj askujt tjetër, kërkoj vetëm një gjë: të mbeteni besnikë ndaj vetes suaj.
Besnikë ndaj asaj që vetë keni thënë gjatë gjithë këtyre viteve!
Që nuk do të lejojmë rikthimin e modeleve të vjetra të korrupsionit dhe keqqeverisjes.
Që nuk do të lejojmë më që shteti ynë të udhëhiqet nga figura të konsumuara, që për vite me radhë kanë qenë pjesë e problemeve që i jetojmë sot.
VLEN është simbol i ndryshimit.
Hapin e parë e bëmë kur i çuam në opozitë.
Tani është koha për hapin e dytë, ta çmontojmë sistemin e tyre dhe më në fund t’i japim një shans shpresës! Të ndërtojmë një sistem meritokracie, ku përparimi varet nga puna dhe vlerat, dhe përgjegjësia është e paevitueshme.Kjo është beteja në të cilën besoj.Në të kam hyrë pa kalkulime dhe prej saj nuk ka tërheqje.
Ju ftoj krah për krah, hap pas hapi ta vazhdojmë këtë betejë për ne, për të ardhmen, për të gjithë. Sepse VLEN!