Ka reaguar Jasir Ibraimi pas publikimit të një lajmi nga gazeta “Koha”, e cila pretendon se ai është avancuar në ARM për shkak të lidhjeve familjare me kryetarin e Alternativës, Zeqirija Ibrahimi.
Në reagimin e tij, Ibraimi e ka quajtur këtë pretendim shpifje të ulët që nuk i ka hije një gazete që pretendon të jetë emri i gazetarisë shqiptare në RMV, e aq më pak ta vendosë në ballinë.
Ai sqaroi se është punësuar në ARM në kohën kur zëvendësministër i Mbrojtjes ka qenë Tiron Jajaga nga Aleanca për Shqiptarët, duke theksuar se nëse dikush kërkon lidhje politike, këtë mund ta kërkojë tek ai subjekt.
“Është e vërtetë se kemi lidhje familjare me Zeqirija Ibrahimin dhe kam respekt për të, por politikisht kemi dallime të papërafrueshme”, theksoi ai.
Sipas Ibraimit, këto shpifje kanë për qëllim njollosjen e figurës së kryetarit të Alternativës dhe flasin për degradimin e gazetarisë në vend.
“Zaten, prej se u përzi veterinaria në gazetari, gazetaria e Kohës nuk mbeti më as taxhi për kuaj”, ka shkruar Ibraimi.
