Një tërmet i fortë, me magnitudë 4.8 ballë sipas shkallës Rihter, goditi mbrëmë Kosovën, konkretisht Prizrenin pranë kufirit me Maqedoninë. Epiqendra e tërmetit ishte 19 kilometra në lindje të Prizrenit dhe 15 kilometra në veriperëndim të Tetovës. Për shkak të afërsisë së epiqendrës, tërmeti u ndje veçanërisht në pjesën perëndimore dhe veriperëndimore të vendit, në Shkup, Tetovë, Gostivar, Dibër, Ohër dhe Strugë, Kumanovë, transmeton Portalb.mk.
Në zona të caktuara, u vu re lëkundje e llambadarëve dhe lëvizje e objekteve më të lehta, por deri më tani nuk ka informacione për dëme më serioze materiale.
Maqedonia si pjesë e një zone sizmike aktive
Rajoni i Ballkanit është një zonë ku përplasen pllakat tektonike euroaziatike, afrikane dhe anatoliane, gjë që e bën atë sizmikisht aktiv. Maqedonia ndodhet në një mjedis gjeologjik kompleks me disa thyerje aktive.
Zonat sizmike më të famshme në vend janë: zona sizmike e Vardarit, zona Dibër-Ohër, zona e Pellagonisë, Lugina e Shkupit.
Media në Serbi, ku gjithashtu u ndje tërmeti, shkruajnë se pas një tërmeti me këtë intensitet, është e mundur të regjistrohen dridhje të mëvonshme, më të dobëta. Megjithatë, ekspertët theksojnë se nuk ka një metodë shkencore për parashikimin e saktë të tërmetit të fortë të radhës.
Edhe pse tërmeti me magnitudë 4.8 ballë u ndje fuqishëm në pjesë të Maqedonisë së Veriut, fenomene të tilla nuk janë të pazakonta për rajonin sizmikisht aktiv të Ballkanit. Sipas komunitetit të ekspertëve, nuk ka arsye për panik, por për kujdes dhe përgatitje.
Tërmeti u ndje edhe në Serbi, Shqipëri, Bullgari dhe Mal të Zi. Qytetarët në të gjithë Ballkanin raportuan se ndienin tërmet.
Përndryshe, epiteti zonë tërmeti në Ballkan vishet kryesisht nga tërmetet në Turqi dhe Greqi, pasi vetë vendet e ish-Jugosllavisë nuk njihen për aktivitet të fortë sizmik. “Megjithatë, do të ishte e pasaktë të thuhej se nuk ka pasur tërmete shkatërruese as në këto territore. Ballkani është një zonë tektonikisht aktive për shkak të përplasjes së tre pllakave të mëdha: euroaziatike, afrikane dhe anatoliane, të cilat ndahen më tej në pllaka më të vogla. Këto procese krijojnë tërmete të shpeshta, megjithëse zakonisht më të dobëta,”, thuhet në analizën e Qendrës së Parashikimit të Tërmeteve Quantectum.
