Bosnja dhe Hercegovina shkon të dielën, më 4 tetor, në zgjedhjet e përgjithshme, në një proces që pritet të ndikojë jo vetëm në të ardhmen politike të vendit, por edhe në orientimin e tij mes Perëndimit dhe Rusisë.
Rreth 3.4 milionë votues do të zgjedhin Presidencën treanëtarëshe, Parlamentin qendror dhe institucionet e dy entiteteve të vendit. Votuesit do të zgjedhin gjithashtu presidentin e Republikës Srpska dhe përfaqësuesit në parlamentet e niveleve të ndryshme.
Fushata është zhvilluar në një klimë të tensionuar politike, me ndarje të thella etnike dhe debate për të ardhmen e vendit, marrëdhëniet me Bashkimin Evropian dhe çështjen e NATO-s. Bosnja është kandidate për anëtarësim në BE, por procesi i integrimit ka avancuar ngadalë.
Në qendër të vëmendjes është edhe ndikimi rus. Vetëm disa ditë para zgjedhjeve, lideri i serbëve të Bosnjës, Milorad Dodik, dhe kryeministri i Republikës Srpska, Savo Miniq, u takuan në Moskë me presidentin rus Vladimir Putin. AP raportoi se takimi u zhvillua në prag të zgjedhjeve dhe se Dodik vazhdon të mbajë lidhje të ngushta me Moskën.
Ndërkohë, ndikimi dhe angazhimi i Shteteve të Bashkuara dhe vendeve perëndimore mbeten një tjetër faktor i rëndësishëm në politikën boshnjake. Sipas Reuters, zgjedhjet mund të ndikojnë në orientimin e vendit, përfshirë rrugën drejt BE-së dhe ekuilibrin mes ndikimit amerikan dhe atij rus.
Zgjedhjet zhvillohen në një sistem politik kompleks, të krijuar pas Marrëveshjes së Dejtonit që i dha fund luftës së viteve 1992–1995. Ndarjet politike dhe etnike vazhdojnë të jenë ndër sfidat kryesore të Bosnjës, ndërsa pas zgjedhjeve pritet një proces i vështirë negociatash për formimin e institucioneve të reja.
Sipas Komisionit Qendror të Zgjedhjeve, votimi do të zhvillohet nga ora 07:00 deri në 19:00, ndërsa këto janë zgjedhjet e para në vend ku do të përdoren identifikimi biometrik i votuesve dhe skanerët e fletëve të votimit.
