Në nder të Ditës Ndërkombëtare të Pyjeve, një aksion simbolik për mbjelljen e drunjve është zhvilluar në vendin Argaç të fshatit Gjurgjevishtë, me pjesëmarrjen e Drejtorit të Institucionit Publik Parku Kombëtar “Mali Sharr”, Emir Husejn, dhe Drejtorit të Inspektoratit Shtetëror të Pylltarisë dhe Gjuetisë, Bejtullah Kamberi. Ky aktivitet shënon nisjen e projektit të ripyllëzimit të një pjese të Malit Sharr, i mundësuar nga një donacion prej 15.000 fidanesh nga kompania holandeze Pure Benefit. Iniciativa pritet të shtrihet edhe në zona të tjera të parapara për ripyllëzim, si pjesë e një angazhimi afatgjatë për mbrojtjen e natyrës.
Pyjet, të cilat zënë rreth 40% të territorit të Maqedonisë së Veriut, përfaqësojnë një pasuri të çmuar natyrore dhe luajnë një rol vendimtar në ruajtjen e biodiversitetit, stabilitetin klimatik dhe përmirësimin e cilësisë së jetës në zonat rurale dhe urbane. Në një periudhë kur pyjet po përballen me kërcënime si dëmtimet, zjarret dhe ndryshimet klimatike, aksione të tilla ndërgjegjësuese konsiderohen thelbësore për të promovuar përgjegjësinë kolektive dhe përkushtimin ndaj mjedisit.
Organizatorët theksojnë se e ardhmja e gjelbër varet nga veprimet dhe kujdesi i përbashkët, duke e cilësuar këtë nismë si një hap të rëndësishëm drejt qëndrueshmërisë mjedisore.
Thuhet ne njoftimin zyrtar te zv/ministrit te bujqesise Flakron Bexheti
