Po shoh që Bogovina po jep porosinë që kjo komunë e cila çdoherë ka qenë kundër BDI-së, që aksidentalisht për një mandat ka rënë në duart e BDI-së, “po kthehet aty ku ka qenë çdoherë”.
Këtë e tha sonte në fjalën e tij, zëvendëskryeministri për qeverisje të mirë, Arben Fetai me rastin e hapjes së Shtabit zgjedhor në këtë komunë në praninë e simpatizantëve partiak.
“Zgjedhja nuk ka qenë kur më e lehtë, është zgjedhje midis paaftësisë dhe korrupsionit në njërën anë dhe profesionalizmit dhe një kuadri të dëshmuar që i ka ndihmuar çdo banori. Është zgjedhje mes të vjetrës dhe të rejës, midis VLEN-it dhe BDI-së”, tha Fetai.
Ai tha se kjo situatë do të bëhet më e qartë më 19 tetor ku siç tha, “do jemi bashkë këtu për të festuar fitoren e Feti Abazit dhe të VLEN-it”.
Zëvendëskryeministri Fetai madje theksoi se me intensitet të madh po punohet në Korridorin 8 dhe çdo projekti me interes kombëtar.
“Na kanë akuzuar edhe për Korridorin 8, thonin se këta të VLEN-it nuk e bëjnë këtë, jemi këtu në Pollog dhe e dimë se me çfarë intensiteti po punohet, po përurohen segmente të reja, punohet në lidhjen me Kosovën dhe çdo projekti me interes kombëtar shqiptarë”, tha mes tjerash Fetai.
