Bill Gates premtoi se do të dhurojë 200 miliardë dollarë përmes fondacionit të tij deri në vitin 2045 dhe njëkohësisht sulmoi Elon Muskun, duke e akuzuar se po i vret fëmijët më të varfër të botës për shkak të ndërprerjes së ndihmës së jashtme amerikane.
Gates, i cili tani është 69 vjeç, deklaroi se po përshpejton planet për të shpërndarë pothuajse gjithë pasurinë e tij dhe se do ta mbyllë fondacionin më 31 dhjetor 2045, më herët nga sa ishte parashikuar. Ai shpreson që paratë të ndihmojnë në çrrënjosjen e sëmundjeve si poliomieliti dhe malaria, në uljen e varfërisë globale dhe në ndaljen e vdekjeve të grave dhe fëmijëve që mund të parandalohen.
“Pamja e njeriut më të pasur në botë që vret fëmijët më të varfër në botë nuk është e bukur. Numri i vdekjeve do të fillojë të rritet. Do të ketë miliona vdekje të tjera për shkak të mungesës së fondeve”, tha Gates.
Ai dhe Musk dikur ishin dakord të dhuronin pasurinë e tyre, por më pas patën disa përplasje.
“Njerëzit do të thonë shumë gjëra për mua pasi të vdes, por jam i vendosur që ‘vdiq i pasur’ të mos jetë njëra prej tyre. Ka shumë probleme urgjente që duhet të zgjidhen”, u shpreh Gates.
Fondacioni i tij këtë vit shënon 25-vjetorin e ekzistencës. Ai u themelua bashkë me ish-bashkëshorten Melinda dhe më vonë iu bashkua edhe miliarderi Warren Buffett. Që nga themelimi, fondacioni ka dhuruar 100 miliardë dollarë.
“Do të mbyllet pasi të kem shpenzuar 99% të pasurisë sime personale”, shtoi Gates.
