Protestuesit sërish bllokuan hyrje-daljen e Komunës së Çashkës. Kundërshtojnë mësimin në gjuhën shqipe në shkollën “Todor Janev”. Nxënësit shqiptarë, por edhe ata maqedonas sërish nuk u lejuan që të vijojnë mësimin. Prindërit e nxënësve apelojnë që sa më shpejtë institucionet të gjejnë zgjidhje që nxënësit të mund të ulen në bankat shkollore.
“Ashtu siç ndodhi dje bllokimi i hyrje-daljes së komunës Çashkë ashtu edhe sot është e bllokuar dhe nuk lejojnë që të hyjnë nxënësit dhe të vazhdojnë mësimin në gjuhen maqedonase dhe gjuhen shqipe, nuk e di pse protestojnë pasi nuk ka bazë që të bëhet kësi lloj proteste dhe institucionet duhet menjëherë të ndërmarrin masa për zhbllokim të rrugës. Cili është apeli juaj si prind i nxënësve? Apeli jonë është që sa më shpejtë të gjendet zgjidhje që nxënësit të vijojnë mësimin pasi humbin të gjithë nxënësit edhe ato maqedonas por edhe nxënësit shqiptarë”, u shpreh një prind i 4 nxënësve të Shkollës Fillore “Todor Janev”.
Përveç prindërve edhe kryetari i komunës së Çashkës, Goran Stojanovski kërkoi që institucionet të ulen dhe të gjejnë zgjidhje. Sipas tij fëmijët kanë të drejtë të shkollohen në gjuhën e tyre amtare.
“Çdo fëmijë në bazë të kushtetutës duhet të mësoje në gjuhen e tij dhe mendoj se edhe qytetaret të cilët vijnë çdo ditë këtu nuk kanë problem me atë pjesë por problemi është në ligjshmërinë sepse kushtetuta garanton por duhet të zbatohet në anë të ligjit dhe këtu është zemërimi tek qytetaret”, tha Goran Stojanovski, kryetar i Komunës Çashkë.
Për shkak të protestës rreth 150 nxënës maqedonas dhe shqiptarë të shkollës fillore Todor Janev nuk po mund të ndjekim procesin mësimor. Me hapjen e paraleles në gjuhen shqipe në këtë shkollë filluan edhe problemet në Çashkë. Gati tre muaj protestuesit kërkojnë që t’i kthehen kompetencat komunës Çashkë, dorëheqjen e drejtoreshës së tanishme dhe zhvendosjen e paraleles shqipe në një fshat tjetër. Gjatë ditës së djeshme protestuesit sulmuan dhe ofenduan në baza etnike edhe ekipin e televizionit Alsat. /Alsat.mk
