Unioni i Shoqatave Shqiptare të Gostivarit në Mërgim ka reaguar fuqishëm pas vendimit të Gjykatës Kushtetuese të datës 25 qershor 2025, e cila rrëzoi si jokushtetuese metodologjinë diskriminuese të regjistrimit të popullsisë të vitit 2021, që ndante qytetarët në kategori “rezident” dhe “jo-rezident”.
Në kumtesën e tyre, Unioni akuzon qeverinë e atëhershme LSDM-BDI për manipulim të qëllimshëm të procesit të regjistrimit dhe përpjekje për zvogëlimin artificial të përqindjes së shqiptarëve në shtet.
“Kjo është një fitore e përbashkët e të gjithë shqiptarëve dhe një dëshmi e qartë se angazhimi dhe këmbëngulja jonë nuk kanë shkuar kot,” thuhet në deklaratën e Unionit. Ata rikujtojnë se për një vit me radhë kanë ngritur zërin në çdo mënyrë të mundshme – në media, në takime publike e institucionale, përmes ankesave zyrtare dhe reagimeve – për të denoncuar padrejtësinë që u bë ndaj më shumë se 170 mijë shqiptarëve të përjashtuar nga përllogaritjet zyrtare.
“Ne nuk u dorëzuam. Nuk e lamë këtë padrejtësi të kalojë në heshtje. E ngritëm zërin, alarmuam dhe kërkuam drejtësi për çdo qytetar të regjistruar në vitin 2021”, thekson më tej kumtesa, ku kritikohet qeveria e atëhershme për cenimin e barazisë kushtetuese dhe për tentativën për të zbehur rëndësinë e mërgatës shqiptare.
“Vendimi i Gjykatës Kushtetuese vërtetoi atë që ne kemi paralajmëruar që në fillim: ndarja në ‘rezident’ dhe ‘jo-rezident’ ishte e padrejtë, antikushtetuese dhe e papranueshme. Sot, të gjithë shqiptarët e regjistruar në vitin 2021 njihen si të barabartë – pa ndarje, pa diskriminim,” thuhet në reagim.
Unioni i Shoqatave Shqiptare të Gostivarit në Mërgim thekson se do të vazhdojë të jetë zëri i mërgatës dhe një faktor i fuqishëm për mbrojtjen e të drejtave të shqiptarëve, duke kontribuar pa ndalur për zhvillimin e komunës së Gostivarit dhe vendlindjes në tërësi.
