Në vitin 2024, Komuna e Sarajit pagoi pothuajse gjysmë milioni euro subvencione për ndërmarrjet publike pa program dhe pa fatura të bashkangjitura, punësoi njerëz me kontratë për punë të rregullt administrative me pagesa mujore prej pothuajse 100,000 eurosh, dhe financoi shoqata dhe individë për mbi 70,000 euro pa vlerësim dhe pa rregullore me kritere për shpërndarjen e fondeve, tregon auditimi i operacioneve financiare të komunës, i kryer nga Enti Shtetërore e Revizionit, transmeton Portalb.mk.
Sipas raportit, Saraji ka pronë të paregjistruar, objekte infrastrukturore që përdoren, por nuk kanë pranim teknik, si dhe një procedurë të zhvilluar në mënyrë të paligjshme për qira 25-vjeçare të Objektit Sportiv dhe Rekreativ dhe Pishinës në Saraj. Revizorët arritën në përfundimin se Komuna e Sarajit po përballet me dobësi në procesin e buxhetimit, kontabilitetit dhe vlerësimit të pronës, subvencionim të papërshtatshëm të ndërmarrjeve private, një procedurë të zbatuar në mënyrë të paligjshme për dhënien me qira të “Objektit Sportiv dhe Rekreativ dhe Pishinës në Saraj” për 25 vjet dhe parregullsi në zbatimin e prokurimit publik në lidhje me lëndën e prokurimit, aktivitete të kryera jashtë specifikimit teknik dhe tejkalim të pragjeve të vlerës.
“Subvencione në vlerë prej 487,805 eurosh u janë paguar NPK “Saraj” dhe NP “Akcios”, pa një program të miratuar subvencionesh dhe pa fatura të bashkangjitura dhe dokumentacion mbështetës për aktivitetet e kryera sipas planit vjetor operativ. Komuna ka paguar 93,415 euro për punësimin e personave me kontratë për punë të rregullt administrative, vazhdimisht për një periudhë më të gjatë se dy vjet, 17,560 euro për shërbime ligjore, bazuar në një kontratë të lidhur për një shumë të caktuar mujore, e cila devijon nga modeli i llogaritjes së tarifave, dhe 71,740 euro për studentë të rinj të talentuar, shoqata qytetare, fondacione, klube sportive, individë dhe institucione që kryejnë aktivitete me interes publik, pa një vlerësim dhe pa një rregullore me kritere për shpërndarjen e fondeve”, zbulojnë revizorët.
Një pjesë e pasurisë së patundshme të komunës nuk është vlerësuar dhe regjistruar në llogari, dhe investimet kapitale për vitin 2024, në vlerë prej 2.3 milionë eurosh, nuk janë regjistruar si asete të prekshme në përgatitje. Revizioni zbulon se objekti sportiv dhe rekreativ dhe pishina në Saraj janë dhënë me qira për një periudhë prej 25 vitesh, pa u zbatuar procedura e përcaktuar me ligj për qira afatgjatë, ku çdo kontratë për përdorimin e pasurisë së paluajtshme që tejkalon 10 vjet konsiderohet procedurë për tjetërsim të përhershëm ose qira afatgjatë dhe për qiradhënien ligjërisht të vlefshme të asaj prone, duhet të ndiqet një procedurë e veçantë, pëlqime dhe miratime shtesë.
Revizorët arrijnë në përfundimin se nuk ka kërkesa të regjistruara për tarifa komunale për përdorimin e hapësirës dhe instalimin e vitrinave për ekspozimin e mallrave para lokaleve afariste, tarifa për legalizimin e ndërtesave të ndërtuara pa leje dhe për rregullimin e tokës ndërtimore. Në bazë të taksës së pronës dhe tarifave komunale për një kompani, komuna ka deklaruar më pak kërkesa për mbi 400,000 euro dhe nuk ka kryer inventar të aseteve dhe detyrimeve dhe nuk ka harmonizuar kontabilitetin me gjendjen aktuale. Komuna ka gjithashtu disa objekte infrastrukturore si rrjete primare dhe sekondare të kanalizimeve, sisteme për kullimin dhe trajtimin e ujërave të zeza, për furnizimin me ujë, ndërtimin dhe rindërtimin e rrugëve dhe rrugicave lokale, me një vlerë prej mbi dy milionë eurosh që nuk kanë dokumentacion për pranimin teknik të kryer, pavarësisht se janë përdorur, nuk janë vënë zyrtarisht në përdorim dhe regjistrohen si investime në vazhdim pa llogaritur amortizimin.
“Komuna nuk ka përgatitur dhe paraqitur në Këshill një Plan Draft të programeve të zhvillimit, dhe buxheti i miratuar nuk përfshin programe për pastërtinë publike, ndriçimin e rrugëve, mirëmbajtjen e gjelbërimit, subvencionimin e ndërmarrjeve publike, mbrojtjen dhe shpëtimin, dhe barazinë gjinore”, përfundon revizioni.
Enti Shtetëror i Revizionit paraprakisht kreu revizionin e raporteve financiare së bashku me revizionin e pajtueshmërisë së Komunës së Likovës, për vitin 2024. Nga aty theksojnë se, janë konstatuar parregullsi dhe mos-harmonizim në punën e komunës, dhe për shkak të rëndësisë së tyre është shprehur mendim i pafavorshëm për vërtetësin dhe objektivitetin e raporteve financiare për vitin 2024 dhe për pajtueshmërinë me rregullativën ligjore, udhëzimeve dhe politikave të vendosura për llogaritë e buxhetit themelor (630) dhe (637) dhe mendim i pafavorshëm për vërtetësin dhe objektivitetin e raporteve financiare për vitin 2024 të llogarisë së të ardhurave të buxhetit të dotacioneve (930).
