Zv/kryeministri për Qeverisje të mirë dhe Transparencë Arben Fetai, sot në Gllumovë të komunës së Sarajit, së bashku me Besar Durmishin – ministër i ekonomisë dhe punës, zv/ministrin e bujqësisë, pylltarisë dhe ekonomisë së ujërave, Flakron Bexheti, vizituan fabrikën për përpunimin dhe prodhimin e produkteve të mishit, “Tiamo”.
“Fabrika “Tiamo” është fabrikë e cila që nga viti 1997 përfaqëson një ndër brendet më të njohura lokale dhe kombëtare dhe është një sinonim i cilësisë dhe traditës afatgjate. Duke u njoftuar me punën rrjedhëse të kompanisë, planet për investime të mëtejshme si dhe rritjen e prodhimit dhe planet për zgjerimin e plasmanit të produkteve në vendet e rajonit, informova menaxhmentin e kompanisënë fjalë se me qëllim të mbështetjes së ndërmarrjeve mikro, të vogla dhe të mesme, Ministria e Ekonomisë dhe Punës ka shpallur pesë thirrje publike në përputhje me Programin për zhvillimin e sipërmarrësisë dhe konkurrencës së ndërmarrjeve të vogla dhe të mesme për vitin 2024. Për masat në përputhje me këtë Program, janë ndarë gjithsej 80.000.000 denarë nga buxheti i Ministrisë së Ekonomisë dhe Punës.
Biseduam rreth thirrjes publike për kompensimin e një pjese të shpenzimeve të ndërmarrjeve mikro, të vogla dhe të mesme për certifikimin e sistemit HALAL. Theksova se sa i përket mbështetjes së biznesit, janë parashikuar 250 milion euro për mbështetjen e kompanive, linjë kreditore të cilat janë siguruar nga ana e Qeverisë së Republikës së Maqedonisë së Veriut me Republikën e Hungarisë. Ministria e Financave tashmë po përgatit ligjet për këtë linjë kreditore, ndërsa në mënyrë plotësuese do të përcaktojë kushtet sipas të cilave kompanitë do të mund të aplikojnë për këto mjete financiare”, përfundon njoftimin e tij Fetai.
