Zëvendëskryeministri për Qeverisje të Mirë, Arben Fetai, ka deklaruar se Konferenca e Shteteve Palë të Konventës së OKB-së kundër Korrupsionit, e mbajtur në Doha, po shkon drejt përmbylljes me mesazhe të qarta për nevojën e një qasjeje të vendosur dhe pa kompromis në luftën kundër korrupsionit.
Sipas Fetait, gjatë ditëve të konferencës mbi 2.500 përfaqësues nga 170 shtete kanë diskutuar zgjidhje konkrete për sfidat aktuale të korrupsionit, duke përfshirë përdorimin e inteligjencës artificiale, rritjen e transparencës në financimin politik, ndërtimin e kulturës së integritetit dhe adresimin e ndërlidhjes së korrupsionit me forma të tjera të krimit të organizuar.
“Mesazhi është i qartë: lufta kundër korrupsionit kërkon institucione që veprojnë, politika që zbatohen dhe besim që ndërtohet me vepra”, ka theksuar Fetai.
Ai shtoi se kjo është rruga që duhet ndjekur pa asnjë kompromis, duke riafirmuar përkushtimin e Qeverisë për forcimin e qeverisjes së mirë dhe sundimit të ligjit.
