Në prag të ndeshjes kualifikuese të Ligës së Kampionëve mes KF Shkëndija dhe Qarabag FK, zëvendëskryeministri, Arben Fetai, ka bërë thirrje publike për respekt dhe sportivitet në tribuna, duke theksuar rëndësinë e promovimit të vlerave të mirëkuptimit dhe unitetit përmes sportit.
“Racizmi, ksenofobia dhe urrejtja nuk kanë vend në futboll!”, thekson Fetai, i cili njëherësh është edhe një dashamirës i futbollit. Ai u ka bërë apel të gjithë tifozëve të Shkëndijës që të përkrahin ekipin me krenari, duke reflektuar vlerat e qytetarisë dhe respektit.
“Futbolli është festë. Është një sport që bashkon e jo që ndanë njerëz. U bëj thirrje të gjithë tifozëve të Shkëndijës të tregojmë kulturën tonë sportive, të mbështesim ekipin tonë me krenari dhe të reflektojmë vlerat e respektit dhe fair play-it të futbollit”, ka deklaruar Fetai.
Ai përfundon mesazhin me një thirrje pozitive: “Ta bëjmë krenare Shkëndijën, ashtu siç ajo na bën krenarë të gjithëve!”.
