Venko Filipçe sot në selinë e partisë e ka marrë pozitën e kryetarit të Lidhjes Socialdemokrate (LSDM) nga ish-lideri Dimitar Kovaçevski, njoftojnë nga partia, transmeton Portalb.mk.
“Në dorëzimin e pozitës, Kovaçevski e uroi Filipçen për zgjedhjen dhe i uroi suksese në punën e tij dhe rindërtimin e LSDM-së fitimtare. Filipçe falënderoi për urimet, si dhe për angazhimin e Kovaçevskit në vitet e kaluara, si kryetar i partisë dhe kryeministër i qeverisë”, thonë nga LSDM.
Venko Filipçe është zgjedhur kryetar i ri i Lidhjes Socialdemokrate (LSDM) më 30 qershor, siç ka bërë të ditur Komisioni Qendror i Zgjedhjeve i kësaj partie, në një procedurë të drejtë dhe demokratike të zgjedhjeve të brendshme partiake. Nga pak më shumë se 12 mijë anëtarë, Filipçe ka marrë 9.052 vota.
Pas shpalljes së rezultateve të zgjedhjeve, Filipçe ka folur nga foltorja në selinë e partisë. Sipas tij, me këto zgjedhje LSDM-ja dëshmoi se ka kapacitet demokratik dhe profesionalizëm të lartë. Ai u ka thënë bashkëpartiakëve se po vjen një periudhë e punës, bashkimit dhe reformimit të LSDM-së.
“Pason një periudhë e riorganizimit dhe reformave sipas premtimeve të mia programore, me të cilat jam i sigurt se LSDM do të fitojë sërish. Kjo nuk do të jetë as e shpejtë, as e lehtë. Por e di që nuk ka rrugë tjetër për të rikthyer besimin e anëtarëve. Për të bërë ndryshime të vërteta thelbësore, nuk mund t’i falsifikojmë qytetarët dhe anëtarët tanë, kështu që ata nuk do ta kthejnë besimin por me siguri do të fitojmë zemrat e qytetarëve nëse kemi sukses në këtë, besoj se LSDM-ja do të kthehet më e fortë dhe do të vazhdojë të jetë motor i përparimit shoqëror”, tha Filipçe.
Më 22 maj, Kovaçevski zyrtarisht konfirmoi tërheqjen e tij nga posti presidencial i partisë. Thirrja për zgjedhjen e liderit të ri u shpall pasi LSDM pësoi humbje katastrofike në zgjedhjet parlamentare të 8 majit, kur fitoi gjithsej 18 mandate parlamentare.
Kovaçevski u bë lider i LSDM-së, i zgjedhur në zgjedhjet e dyta të drejtpërdrejta brenda partisë, të cilat u mbajtën si të jashtëzakonshme, pas dorëheqjes së Zoran Zaevit. Nga gjithsej 44.406 anëtarë që kanë dalë për të votuar, për të kanë votuar 37.649 anëtarë.
