Gostivar, 7 tetor 2025 – Në prag të zgjedhjeve lokale të 19 tetorit, Qendra për Hulumtime dhe Komunikim Politik (CRPC) ka publikuar rezultatet e një ankete orientuese që shpalosin një tablo jo fort të favorshme për administratën aktuale të Komunës së Gostivarit dhe kryetarin në detyrë, Valbon Limani.
Sipas të dhënave, më shumë se gjysma e qytetarëve (57,3%) e kanë vlerësuar punën e Komunës si “dobët” ose “shumë dobët”, ndërsa vetëm 35,4% e konsiderojnë se qeverisja e deritanishme ka qenë “mirë” ose “shumë mirë”. Ky raport tregon qartë pakënaqësinë e thellë ndaj performancës komunale gjatë mandatit të fundit.
________________________________________
Papastërti dhe shpërngulje e të rinjve – problemet më shqetësuese për qytetarët
Anketa ka nxjerrë në pah problemet më të theksuara me të cilat përballet Gostivari.
Në krye të listës qëndron papastërtia dhe shërbimet e dobëta komunale (31,7%), ndjekur nga shpërngulja e të rinjve (28%), keqmenaxhimi dhe korrupsioni (19,5%), si dhe infrastruktura e dobët rrugore (9,8%).
Këto rezultate flasin për një perceptim të qartë të qytetarëve se menaxhimi i deritanishëm nuk ka arritur të adresojë sfidat bazike të qytetit.
________________________________________
Përkrahje politike nën hijen e pakënaqësive
Megjithëse Valbon Limani (AKI) aktualisht kryeson me 41,6% përkrahje, një përqindje e konsiderueshme e qytetarëve është orientuar drejt Sebaedin Dautit nga koalicioni VLEN (30,3%), ndërsa kandidati i pavarur Visar Ademi renditet me 18%.
Një pjesë e vogël (4,5%) mbeten ende të pavendosur. Analistët vlerësojnë se përqindja e lartë e qytetarëve të pakënaqur me punën komunale mund të ndikojë në lëvizje të rëndësishme të votave në ditët e fundit të fushatës.
________________________________________
Vlerësim i ulët, sinjal për ndryshim
Sipas CRPC-së, anketa është realizuar me 465 qytetarë të Gostivarit nga data 3 deri më 6 tetor 2025, përmes metodës “sy më sy” në terren, me një marzh gabimi ±3%.
Edhe pse Limani udhëheq në përqindje momentalisht, struktura e përgjithshme e rezultateve e karakterizuar nga kritika të shumta për menaxhim, shërbime dhe transparencë, sugjeron një rënie të dukshme të besimit publik ndaj administratës së tij.
Në përfundim, anketa e CRPC-së nuk parashikon rezultatin zgjedhor, por pasqyron me saktësi mendimin e momentit në mesin e qytetarëve të zhgënjyer që kërkojnë ndryshim dhe qeverisje më efikase në Gostivar.
