Në një deklaratë për mediat, zëvendëskryeministri i parë dhe kandidati i VLEN-it për komunën e Çairit, Izet Mexhiti, ka shpalosur realitetin e hidhur të 20 viteve të pushtetit të BDI-së, duke e demaskuar hapur kundër kandidatin e tij, Bujar Osmanin.
Mexhiti theksoi se shqiptarët nuk kanë qenë kurrë më të fortë dhe më përfitues nga Qeveria sesa gjatë këtij një viti qeverisje të VLEN-it, periudhë në të cilën komunat shqiptare për herë të parë po realizojnë projekte madhore për ujësjellës, kanalizim dhe infrastrukturë moderne.
“Po të ishin faktor shqiptarët gjatë 20 viteve të kaluara me BDI-në, sot nuk do të flisnim për ujësjellës e kanalizim, rrjet atmosferik që po i bëjmë ne. Komunat shqiptare kurrë nuk kanë përfituar më shumë nga Qeveria sesa sot,” tha Mexhiti, duke shpërfaqur paaftësinë e BDI-së.
Por goditja më e ashpër e Mexhitit shkoi drejtpërdrejt për Bujar Osmanin, të cilin e akuzoi për një mendësi të rrezikshme ndaj shqiptarëve.
“Ndoshta Bujar Osmani mendon që shqiptarët janë faktor vetëm kur ndodhi rasti Monstra, rasti i Kumanovës, kur vriten shqiptarët, kur burgosen shqiptarët, kur rrihen shqiptarët. Përndryshe, në mendjen e Bujarit, shqiptarët nuk ekzistojnë,” u shpreh Mexhiti, duke e shpartalluar narrativin e BDI-së.
Ai kujtoi se gjatë një viti të qeverisjes së VLEN-it nuk ka pasur asnjë rast të korrupsionit, as burgosje të montuara politike, ndërkohë që me BDI-në shqiptarët përjetuan qindra skandale e procese të fabrikuara.
“Dy rastet e vetme që u hapën, përfunduan në prehrin e BDI-së. Kjo është arsyeja pse BDI dhe Bujar Osmani janë në panik, sepse nuk kanë ide, nuk kanë vizion, dhe nuk kanë asgjë për t’i ofruar qytetarëve veç frikës nga e shkuara e tyre e errët,” deklaroi Mexhiti.
