Kina njoftoi se do të vendosë tarifa të reja prej 34% ndaj SHBA-së, të cilat do të hyjnë në fuqi më 10 prill. Kjo është një përgjigje ndaj vendimit të Donald Trumpit, i cili dy ditë më parë rriti tarifat për importet nga Kina në 54%.
Ministria e Financave e Kinës tha se tarifat e reja amerikane nuk janë në përputhje me rregullat ndërkombëtare të tregtisë dhe paralajmëroi masa hakmarrëse, duke përshkallëzuar kështu luftën tregtare globale. Kina gjithashtu ka paraqitur një paditje në Organizatën Botërore të Tregtisë.
Dy ditë më parë, Trump vendosi tarifa të reja për gjithë importin në SHBA, duke i dhënë goditjen më të madhe tregtisë ndërkombëtare që nga Lufta e Dytë Botërore. Plani ekonomik i tij parashikon një tarifë minimale prej 10%, por produktet nga rreth 60 partnerë tregtarë, të cilët Shtëpia e Bardhë i ka quajtur shkelësit më të mëdhenj, si BE-ja dhe Kina, do të përballen me tarifa më të larta. Tarifat e reja prej 10% do të fillojnë të mblidhen më 5 prill, ndërsa tarifat më të larta për disa shtete do të mblidhen më 9 prill.
Bashkimi Europian gjithashtu njoftoi se po përgatit një përgjigje, por nuk do të nxitojë.
“BE do të përgjigjet në një mënyrë të qetë, të kujdesshme dhe të koordinuar. Dëshirojmë t’u japim mundësi bisedimeve për të gjetur një marrëveshje të drejtë për të dyja palët,” tha komisioneri i BE-së për tregtinë, Maroš Šefčovič.
Kompani amerikane humbën triliona dollarë nga vlera e tyre pas shpalljes së tarifave të reja për gjithë importin e huaj. Praktikisht të gjithë sektorët pësuan humbje të mëdha, ndërsa tregjet financiare amerikane regjistruan rënien më të madhe në një ditë që nga pandemia e COVID-19 pesë vjet më parë.
