Gjatë ditëve të fundit në vend kemi bërë një analizë të numrit të votuesve apo banorëve në nivel qytetesh e fshatrash. Kjo analizë nxjerr në sipërfaqe disa fakte të pakontestueshme, pasi analiza është bërë nga numrat zyrtar të Entit Shtetëror për Statistikë (ESHS). Fenomeni i parë që bie në sy është mungesa e banorëve të regjistruar. Po e nis me atë se kush po i fshin shqiptarët nga Maqedonia e Veriut dhe si mundet Gërçeci të ketë 36 banorë dhe 2.000 votues?, ka thënë në konferencën e sotme për shtyp, Merita Koxhaxhiku nga Lëvizja Demokratike.
Në vazhdim, thekson ajo ky fenomen i dallimeve të palogjikshme vërehet në shumicën e vendbanimeve ku jetojnë shqiptarë.
Sipas regjistrimit të fundit Reçica e Vogël ka 2468 banorë, ndërsa 8216 votues; fshati Turçan në Gostivar ka 1208 banorë, por 4501 votues; fshati Turçan i vogël në Gostivar me 96 banorë por me 709 votues dhe Gërçeci me vetëm 36 banorë, por 1946 votues.
“Duam të pyesim publikisht a e kanë informuar zëvendësdrejtori i Entit të Statistikave Ilmi Selami dhe Artan Grubi, Ali Ahmetin se Gërçecit e Reçicës ia kanë fshi popullsinë? Ose të konstatojmë se BDI ka pasur qëllim t’i shpërngul gjithë shqiptarët në diasporë, dhe thjeshtë duke u nxituar i kanë fshi nga evidenca mijëra shqiptarë akoma pa ua dhënë atë që i simbolizon ata, valixhen, për t’i dëbuar nga vendlindja!?”, ka thënë Koxhaxhiku, duke shtuar se procesi i regjistrimit shpesh ka qenë edhe temë e debateve të ashpra publike por pse jo edhe mjet i pazareve politike mes partnerëve politik.
