Ministri i Ekonomisë dhe Punës, Besar Durmishi, realizoi takim pune me Ambasadoren e Kroacisë, Sh.S. Nives Tiganj, ku u diskutua avancimi i bashkëpunimit ekonomik mes dy vendeve.
Ministri Durmishi theksoi rritjen e vazhdueshme të tregtisë dypalëshe dhe rritjen e eksportit drejt Kroacisë, duke nënvizuar potencialin për bashkëpunim në sektorë kyç si energjetika, industria ushqimore, farmacia, ndërtimtaria dhe turizmi. Ai riafirmoi përkushtimin e Qeverisë për krijimin e një klime të favorshme afariste dhe tërheqjen e investimeve të huaja që gjenerojnë vende cilësore pune.
