Që nga fillimi i muajit dhjetor janë regjistruar 18.318 kundërvajtje në trafik, ndërsa 123 persona janë privuar nga liria për drejtim të pakujdesshëm të automjetit.
Në periudhën nga 01.12.2025 deri më 28.12.2025, si rezultat i kontrolleve të rregullta të trafikut të realizuara nga zyrtarët policorë të të gjithë sektorëve për punë të brendshme në rrugët e vendit, nga gjithsej 18.318 fletëpagesa të lëshuara, 4.019 kundërvajtje kanë të bëjnë me drejtues që nuk e kanë respektuar shpejtësinë e lejuar.
Sipas nenit 297-a të Kodit Penal, për drejtim të pakujdesshëm të automjetit janë privuar nga liria 123 persona, prej të cilëve 100 për drejtim nën ndikimin e alkoolit, 13 për tejkalim të shpejtësisë së lejuar në vendbanim, shtatë për tejkalim të shpejtësisë së lejuar jashtë vendbanimit dhe tre për drejtim në drejtim të ndaluar.
Më tej, sipas statistikave të aktiviteteve policore, gjatë muajit dhjetor janë evidentuar 5.018 kundërvajtje për parkim të parregullt, 1.843 masa ndaj drejtuesve që kanë drejtuar automjet pa patentë shoferi, si dhe 679 sanksione për drejtim nën ndikimin e alkoolit.
Në përputhje me Ligjin për sigurinë e trafikut rrugor, janë sanksionuar 18 drejtues motoçikletash për mosmbajtje të helmetës mbrojtëse, si dhe 415 këmbësorë. Gjithashtu, janë sanksionuar 1.046 pjesëmarrës në trafik që nuk kanë përdorur rripin e sigurimit.
Sipas Ligjit për automjete, 322 automjete janë larguar nga qarkullimi për shkak se kanë qenë të paregjistruara, ndërsa 172 për shkak të defekteve teknike. Janë sanksionuar edhe 101 drejtues për mosplotësim të kushteve të përcaktuara lidhur me errësimin e xhamave të automjeteve (foli).
Kontrollet e trafikut do të vazhdojnë edhe në ditët në vijim. U bëjmë apel të gjithë pjesëmarrësve në trafik t’i respektojnë rregullat dhe dispozitat rrugore, në mënyrë që së bashku të kontribuojmë për rrugë më të sigurta.
