Ja nisëm me punë nga dita e parë, siç ju kam premtuar. Dëbërca sot!
Pas një fitoreje bindëse në zgjedhjet lokale, kryetari i Komunës së Zhelinës, Blerim Sejdiu, ka filluar menjëherë me realizimin e premtimeve të dhëna gjatë fushatës. Me energji të re dhe me përkushtim të palëkundur ndaj qytetarëve, ai nisi mandatin e tij të tretë me punë konkrete në terren këtë herë në Dëbërcë, ku kanë filluar punimet për projekte infrastrukturore që do të përmirësojnë jetën e banorëve.
“Ne nuk humbasim kohë me fjalë. Siç e kam thënë gjithmonë, puna nis që ditën e parë. Banorët e Dëbërcës dhe të gjithë komunës do ta shohin se mandati i tretë do të jetë edhe më i fuqishëm, me më shumë projekte, më shumë investime dhe më shumë rezultate konkrete,” theksoi Sejdiu.
Kryetari shtoi se përkushtimi ndaj çdo fshati të komunës mbetet prioritet kryesor, duke theksuar se zhvillimi i barabartë dhe transparenca do të jenë themel i punës së tij edhe në këtë mandat.
Punimet që kanë nisur në Dëbërcë janë vetëm fillimi i një plani më të gjerë investimesh që përfshin infrastrukturën rrugore, ndriçimin publik, hapësirat rekreative dhe përmirësimin e shërbimeve komunale.
Blerim Sejdiu po dëshmon se fitorja nuk ishte rastësi, por rezultat i besimit që qytetarët kanë ndërtuar ndaj tij falë punës së ndershme, përkushtimit dhe rezultateve të prekshme gjatë dy mandateve të kaluara.
“Fitorja është përgjegjësi, jo vetëm gëzim. Tani është koha të tregojmë se besimi që qytetarët na dhanë do të kthehet në vepra. Zhelina do të vazhdojë të ecë përpara me projekte, me zhvillim dhe me dinjitet,” përfundoi ai.
