Zv/Kryeministri për Qeverisje të Mirë dhe Transparencë, Arben Fetai bashkë me deputetin e VLEN, Rijad Shaqiri nga zona e Likovës gjatë ditës së sotme kanë qenë afër banorëve të fshatit Nikushtak të komunës së Likovës për të parë dëmet e shkaktuara nga reshjet e mëdha të shiut dhe breshërit.
Fetai përmes një postimi në faqen zyrtare thekson se do të insistoj që dëmet e shkaktura të kompenzohen nga Qeveria bazuar në ligjin për mbrojtje nga fatkeqësitë natyrore.
Postimi i plotë:
“Bashkë me Deputetin e zonës, Rijad Shaqiri, ishim sot në f. Nikushtak për t’u qëndruar pranë banorëve të kësaj ane dhe për të parë nga afër dëmet e shkaktuara nga rreshjet e mëdha të shiut dhe breshërit që kanë goditur rrethin e Likovës këto 3 ditë të fundit.
Nga Komisioni komunal për mbrojtje nga fatkeqësitë natyrore, kuptuam se janë shkaktuar shumë dëme, veçanërisht në kultura bujqësore por edhe në biznese dhe shtëpi private. Kuptuam se elaborati dhe kërkesa e Komunës janë në përgatitje e sipër dhe se ato do të dorëzohen në Qeveri gjatë ditëve në vijim.
Do të insistojmë që dëmet e shkaktura të kompenzohen nga Qeveria bazuar në ligjin për mbrojtje nga fatkeqësitë natyrore. Kjo vlen veçanërisht për bujqësinë sepse e dimë se shumë bujq varen nga kulturat e tyre për të siguruar të ardhura për familjet e tyre”, ka përfunduar Fetai.
