Rubrika e Re në FOL: “Flokë e Politikë” – Satira që ju qeth mendimet… jo flokët!
Në një kohë kur politika lokale është bërë më shumë thashethem se vizion, më shumë “show” se strategji, portali FOL sjell për ju një seri të re satirike me titullin: “Flokë e Politikë”.
Ku zhvillohet ngjarja?
Në vendin ku bisedat janë më të sinqerta se konferencat për shtyp… në berberinë e Dajës Ilmi, diku mes pluhurit të Tetovës, shiritave të asfaltit dhe premtimeve elektorale që fryjnë më shumë se fenë e berberit.
Kush janë personazhet?
Daja Ilmi – Berberi që i pret më fort me fjalë se me brisk. Mali – Gazetari lokal që vrapon pas çdo “skandali të radhës”. Xhaferi prej Debreshi – Taksisti që di më shumë se çdo sondazh. Shpëtimi – Aktivisti i mbetur mes dy partive dhe dy borxheve. Drini – Studenti që beson ende në etikën gazetare. Shankisti – Thashethemexhiu profesional që e mashtron edhe vetveten. Postieri – Militanti i BDI-së, që çdo letër e kthen në fletushkë propagandistike.Çfarë do lexoni në çdo episod?
Humor popullor, batuta therëse dhe debate politike të përmasave “lokale-epike”. Dialogë që përfaqësojnë nervin e rrugës, zhgënjimin qytetar dhe ironinë shqiptare. Një pasqyrim satirik të asaj që ndodh në realitet, por që askush nuk e thotë publikisht.Pse e sjellim këtë rubrikë?
Sepse ne te FOL besojmë se politika nuk është vetëm numra dhe statuse Facebook-u. Politika është edhe ajo çfarë thuhet në berberi, në taksi, në rrugë… dhe në kafe lagjesh.
Prandaj, çdo javë…
Lexoni, qeshni… dhe reflektoni me “Flokë e Politikë”!
Në fund të fundit… ata presin flokët… por ne presim maskat.
Së shpejti…
