Qytetarë të shumtë, figura publike dhe zëra me vetëdije të lartë qytetare po e përshëndesin dhe mbështesin hapur projektin Safe City, duke e cilësuar atë si një domosdoshmëri për vendosjen e rendit dhe ligjit në komunikacion. Pas votimit të sotëm në Kuvend që hap rrugën për fillimin e zbatimit të këtij projekti, reagimet pozitive po shtohen, ndërsa mes tyre spikat edhe qëndrimi i guximshëm i artistit Elmir Sejfullai, i cili pa hezitim është rreshtuar në anën e sigurisë dhe përgjegjësisë qytetare.
Votimi i sotëm në Kuvend për ligjin që mundëson fillimin e zbatimit të projektit Safe City përfaqëson një hap të domosdoshëm, të vonuar por të guximshëm, drejt vendosjes reale të rendit, ligjit dhe sigurisë në komunikacion.
Ky nuk është thjesht një projekt teknologjik, por një provë e qartë nëse shteti është i gatshëm të mbrojë jetën e qytetarëve të vet mbi çdo kompromis politik apo populist.
Qytetarët me vetëdije të lartë e kanë përshëndetur këtë vendim, sepse e kuptojnë se siguria nuk është luks, por e drejtë themelore. Për vite me radhë, rrugët tona janë shndërruar në hapësira rreziku, ku shkelja e ligjit është normalizuar, ndërsa pasojat kanë qenë tragjike.
Në këtë debat publik, një zë i guximshëm dhe i sinqertë ka ardhur nga artisti Elmir Sejfullai, i cili pa ekuivoke e ka mbështetur Safe City, duke pranuar se ndoshta ky qëndrim nuk është popullor, por është i drejtë. Ai thekson se nuk ka asnjë arsye logjike të ikim nga siguria më e madhe në komunikacion, në një realitet ku të gjithë e dimë se sa shpesh vozitet pa leje, pa regjistrim dhe pa kulturë elementare rrugore.
Sejfullai, me një vetëdije qytetare për t’u vlerësuar, pranon se edhe vetë mund të ndëshkohet në fillim, por pikërisht ky është thelbi i ligjit: ndëshkimi që edukon, korrigjon dhe shpëton jetë. Kur preket ekonomia personale, hapen sytë; kur respektohet ligji, mbrohet familja dhe shoqëria.
Mbështetja e tij është shembull se si figurat publike mund dhe duhet të mbajnë përgjegjësi morale, duke përkrahur veprime të guximshme të qeverisë për sigurinë e qytetarëve, edhe kur ato kërkojnë sakrifica individuale.
Safe City nuk është kundër qytetarit, është kundër kaosit. Nuk është ndëshkim, është parandalim. Nuk është kontroll i panevojshëm është mbrojtje e jetës.
Prandaj, votimi i këtij ligji duhet parë si fillimi i zbatimit konsekuent të ligjit, pa selektivitet dhe pa hezitim. Sepse një shtet që nuk garanton siguri në rrugë, nuk mund të pretendojë siguri askund tjetër.
Një “BIG YES” për Safe City, për jetën, për rendin dhe për të ardhmen.
