Kryetari aktual i Komunës së Zhelinës dhe kandidati për një mandat të tretë nga koalicioni VLEN, Blerim Sejdiu, ka premtuar përfundimin e dy rrugëve kyçe në komunë gjatë mandatit të ardhshëm: Merovë–Sallarevë dhe Cerovë–Zhelinë.
Deklarata u bë gjatë debatit zgjedhor përballë kandidatit të koalicionit AKI për Komunën e Zhelinës.
Ai shtoi se projektet janë tashmë të planifikuara dhe se përgatitjet teknike dhe financiare janë në fazë të avancuar, duke garantuar se realizimi i tyre do të nisë menjëherë në fillim të mandatit të ardhshëm.
Në këtë debat Sejdiu foli dhe zbuloi edhe listën e projekteve të përfunduara dhe atyre në proces, duke theksuar se fokusi ka qenë gjithmonë në interesin e qytetarëve.
Rrugët Merovë–Sallarevë dhe Cerovë–Zhelinë janë kërkesa të kahershme të banorëve të zonave përkatëse, të cilët presin zgjidhje për përmirësimin e infrastrukturës dhe qasjes më të lehtë ndërmjet vendbanimeve.
