“Kemi biseduar me Mickoskin dhe tema e parë që kemi hapur ka qenë eurointegrimi. Kjo rrugë duhet të vazhdohet, ndërsa edhe Mickoski është pro, përveç dy partive, të gjitha të tjerat në Maqedoni mendojnë se nuk ka alternativë tjetër për vendin pos BE-së”.
Kështu tha në emisionin “On Time” në televizionin Koha, Arben Taravari, njëri nga liderët e koalicionit “Vlen” i cili është pjesë e qeverisë së re në Maqedoninë e Veriut.
Sipas Taravarit qeveria e kaluar që në 2018-të ka thënë se i kemi filluar bisedimet, por realisht, shtoi ai, ne nuk i kemi filluar bisedimet ende me BE-në përnderisa nuk i kemi bërë ndryshimet kushtetuese.
“E kemi biseduar me Mickoskin, ai i ka treguar planet dhe qendrimin e vetë dhe unë mendoj se komplet situata është e mirë sepse kemi numër prej 78 deputetësh dhe duke e ditur se nuk ka deputetë shqiptar që nuk voton për ndryshimet kushtetuese, i kemi mbi 80 vota në çdo moment. Do të duhet të gjejmë një solucion i cili do të ishte i pranueshëm edhe për Shkupin, edhe për Sofjen. Ne, vazhdimsht edhe me z.Mickoski por edhe me përfaqësues ndërkombëtarë të cilët i quajmë miq jemi në komunikim dhe ato janë aty për ta ndihmuar këtë proces që të ndodh sa më shpejt”, theksoi Taravari.
Mickoski, tha Taravari, nuk e ka problemin me futjen e bullgarëve në Kushetutë por te protokolli që mos vijnë kushtëzime të reja nga ana e Bullgarisë.
“Unë jam optimis, por e vetmja gjë që më brengos është situata në Bullgari. Atje kishte zgjedhje para 2-3 tjavësh dhe ende nuk ka qeveri. Pritshmëria ishte që edhe atje të kemi qeveri stabile dhe se nuk do shkojnë në zgjedhje përsëri pas gjashtë muajsh, por sipas të gjitha informatave që i marrim Bullgaria mund të ketë qeveri të pakicës dhe në nëntor apo dhjetor përsëri të shkonë në zgjedhje. Tash cilado parti që atje mund të bëjë një lëshim shumë të vogël kundrejtë Maqedonisë, mund të dëmtohet shumë në zgjedhje të cilat mund të mbahen në fund të vitit. Ky mund të jetë një lloj problemi, mund ta stagon stituatën në gjetjen e zgjedhjes”, sqaroi Taravari.
