Presidenti aktual i SHBA-së, Donald Trump, ka vendosur tarifa të reja për 60 vende, përfshirë Maqedoninë e Veriut, si dhe vendet e rajonit, të cilat do të ndryshojnë ndjeshëm dinamikën e importeve në SHBA. Tarifa prej 33% është vendosur për Maqedoninë, ndërsa Serbia është goditur me normën më të lartë prej 37%, Bosnja dhe Hercegovina me 35%, ndërsa Shqipëria, Mali i Zi dhe Kosova me 10%.
“Kjo është dita që ne e bëjmë Amerikën të pasur përsëri – prandaj e quaj 2 Prill 2025 Dita e Emancipimit. Punëtorët, fermerët dhe artizanët kanë vuajtur nga duart e shkabave të huaja që na kanë shfrytëzuar dhe na kanë vjedhur. Taksapaguesit tanë janë grabitur për më shumë se 50 vjet dhe kjo nuk do të ndodhë më për një kohë të gjatë në histori amerikane”, tha Trupm duke përshëndetur dhe prezantuar ndihmësit e tij më të afërt.
Më pas ai përsëriti disa herë se ekonomia amerikane është viktimë e ndikimit dhe praktikave të huaja. Ai akuzoi vendet e tjera për ndotjen e mjedisit dhe se vetëm Shtetet e Bashkuara u ndëshkuan dhe sulmuan për këtë.
Presidenti amerikan Donald Trump, në një moment të fjalimit të tij, tregoi një tabelë të titulluar “Tarifat reciproke”. Grafiku tregon tarifat që vendet e tjera kanë vendosur ndaj Shteteve të Bashkuara dhe tarifat që Shtetet e Bashkuara sapo kanë vendosur ndaj këtyre vendeve.
SHBA-ja do të vendosë tarifa edhe ndaj Bashkimit Evropian (20 për qind), Vietnamit (46 për qind), Tajvanit (32 për qind), Japonisë (24 për qind), Indisë (26 për qind), Koresë së Jugut (25 për qind) dhe Tajlandës (36 për qind).
Një ndër masat më të rëndësishme të shpallura është tarifa prej 25 për qind mbi të gjithë prodhuesit e huaj të automjeteve.
Sipas Trump, mbi 80 për qind e veturave të prodhuara në Korenë e Jugut shiten brenda vendit, ndërsa mbi 90 për qind e automobilave të shitura në Japoni janë të prodhuara po aty. Në të kundërt, automjetet amerikane përfaqësojnë një pjesë shumë të vogël të tregut në këto vende.
