Sot, përfaqësuesit e koalicionit VLEN, Izet Mexhiti, Zeqirija Ibrahimi dhe Arben Fetai, zhvilluan një takim me kandidatin e pavarur për kryetar të Komunës së Studeniçanit, Azem Sadiku.
Gjatë takimit u diskutua për bashkërendimin e mbështetjes së VLEN-it në raundin e dytë të zgjedhjeve lokale, si dhe për mundësitë zhvillimore të Komunës së Studeniçanit. Po ashtu, u theksua rëndësia e bashkëpunimit mes pushtetit qendror dhe atij lokal për të avancuar projekte konkrete në interes të qytetarëve të Karshiakës.
Kandidati Azem Sadiku u shpreh mirënjohës për mbështetjen e dhënë nga VLEN, duke theksuar se kjo është një garanci për stabilitet dhe zhvillim. Ai u zotua se do të vazhdojë projektet e nisura dhe se në mandatin e ardhshëm, Studeniçani do të marrë pamjen e një komune të zhvilluar dhe me mundësi të reja investimi.
Nga VLEN u theksua se mbështetja për kandidatin Sadiku është një hap drejt ndërtimit të institucioneve efikase, transparente dhe të afërta me qytetarin, duke e konsideruar këtë bashkëpunim si model të ri të politikës lokale.
